म्याक्सवेलको शतकसँगै भारतले घुँडा टेक्यो

एजेन्सी – ग्लेन म्याक्सवेलले अाक्रामक शतक बनाएपछि अष्ट्रेलियाले भारतलाई ७ विकेटले पराजित गरेको छ । यससँगै पहुना टोलीले २ खेलको टि-२० सिरिज २-० ले अाफ्नो पक्षमा पार्यो ।

टस हारेर पहिलो ब्याटिङको निम्तो पाएको भारतले निर्धारित २० अोभरमा ४ विकेट गुमाउँदै १ सय ९० रन जोड्यो । कप्तान विराट कोहलीले ३८ बलमा नटअाउट ७२ रन बनाएपछि भारतले विशाल योगफल तयार पारेको थियो । अाक्रमक ब्याटिङ गर्दै २ चौका र ६ छक्का प्रहार गरेका कोहलीलाई पूर्व कप्तान महेन्द्रसिंह धोनीले पनि राम्रो साथ दिए । धोनीले २३ बलमा समान ३-३ चौका र छक्का प्रहार गर्दै ४० रन जोडे ।

जवाफमा ग्लेन म्याक्सवेलले ५० बलमा शतक पूरा गर्दै ५५ बलमा १ सय १३ रन बनाएपछि अष्ट्रेलियाले अन्तिम अोभरमा लक्ष्य प्राप्त गर्यो । म्याक्सवेलले ७ चौका र ९ छक्का प्रहार गर्दै भारतीय बलरहरुमाथि दवाव बनाइरहे । अोपनर डार्सी सर्टले २८ बलमा ४० रन जोड्दा पिटर ह्यान्डसकम्ब २० रनमा नटअाउट रहे ।