काठमाडौं (हाम्रो खेलकुद) – कप्तान रुविना क्षेत्रीको ह्याट्रिकसँगै अलराउन्ड प्रदर्शनमा नेपाली महिला राष्ट्रिय क्रिकेट टोलीले आईसीसी विश्वकप छनोट एसिया क्षेत्र प्रतियोगिताको अन्तिम खेलमा कुवेतलाई ३० रनले पराजित गरेको छ ।

नेपालले प्रस्तुत गरेको १ सय १७ रनको लक्ष्य पछ्याउने क्रममा कुवेतले २० ओभरमा ९ विकेट गुमाउँदै ८६ रनमात्र जोड्न सक्यो । रुविनाले इनिङको अन्तिम तीन बलमा लगातार विकेट लिँदै नेपालको जितमा महत्त्वपूर्ण प्रदर्शन गरेकी हुन् । कुवेतका लागि कप्तान मरियम ओमारले २९ रन जोड्दा ओपनरद्वय प्रियादा मुरलीले १४ तथा सब्रिन जाकिले १२ रन जोडे । नेपालका लागि रुविनाले ४ ओभरमा १७ रनब खर्चेर ३ विकेट लिंदा करुणा भण्डारीले पनि १२ रन खर्चेर ३ विकेट हात पारिन् । नेरी थापा र कविता कुँवरले १-१ विकेट लिए ।

त्यसअघि ब्याटिङमा पनि रुविनाले १३ बलमा २२ रन जोड्दै अन्तिम बलमा क्याच आउट भएकी थिइन् । नेपालले २० ओभरमा ७ विकेट गुमाउँदै १ सय १६ रन जोडेको थियो । उनले ३ चौका प्रहार गरिन् । नेपाललाई बलियो योगफलसम्म पुर्याउन विन्दु रावलले सर्वाधिक २८ रनको योगदान दिईन् । काजल श्रेष्ठ १८ रनमा रनआउट हुँदा सिता रानामगरले खाता खोल्न सकिनन् । नेरी थापाले पनि ३ चौकाको मदतले १९ रन जोडिन ।

नेपालले प्रतियोगिताको ६ खेलमा ५ जित र १ हार बेहोर्यो । १० अंक जोडेको नेपाल अंक तालिकाको दोस्रो स्थानमा रहेको छ । अन्तिम खेलमा यूएई र थाईल्यान्डको खेलपछि शीर्ष टोलीको छिनोफानो हुनेछ । नेपाल दोस्रो चरणमा पुग्ने सम्भावना समाप्त भैसकेको छ ।