धनगढी(हाम्रो खेलकुद) – महेन्द्रनगर युनाइटेडले तेस्रो संस्करणको रुस्लान धनगढी प्रिमियर लिग (डिपिएल) को फाइनल खेलमा सिवाईसी अत्तरियालाई १ सय २४ रनको लक्ष्य दिएको छ ।

फाप्ला क्रिकेट मैदानमा टस जितेर पहिला ब्याटिङ थालेको महेन्द्रनगरले २० ओभरमा अल आउट हुँदै १ सय २३ रन बनायो । महेन्द्रनगरका लागि ओपनर दिलिप नाथले ४१ बलमा ५ चौका र १ छक्का प्रहार गर्दै सर्वाधिक ४३ रन बनाए ।

नाथलाई १६ ओभरको पहिलो बलमा सन्नी पटेले बोल्ड आउट गरेका थिए । कुशल मल्लले २५ रनको योगदान दिए । १५ ओभरको पहिलो बलमा रन आउट हुनु अघि २२ बलमा १ चौका र २ छक्का प्रहार गरे ।

तल्लो क्रमका रोहित कुमार पौडेलले आक्रमक रुपमा ब्याटिङ गर्दै २० बलमा समान १ चौका र छक्का प्रहार गर्दै २४ रनमा क्याच आउट भए । महेन्द्रनगरले पहिलो विकेटका रुपमा दोस्रो ओभरको दोस्रो बलमा मोहम्मद नाविदलाई १० रनमा गुमायो ।

दिपेन्द्रसिंह ऐरीको बलमा कमलसिंह ऐरीले क्याच गर्नु अघि नाविदले ५ बलमा समान १ छक्का र चौका प्रहार गरे । यसै ओभरको अन्तिम बलमा आनन्द सुब्रमनियम २ रनमा रन आउट हुन पुगे । दिलिप नाथसँग रनको तालेमल गर्न नसक्दा सन्नी पटेलले आनन्दलाई रन आउट गराए ।

कप्तान दिपेन्द्रले ८ औं ओभरको पहिलो बलमा आरिफ शेखलाई ११ रनमा क्याच आउट गराए । सन्नीले क्याच गर्नु अघि आरिफले १७ बलमा १ चौका प्रहार गरे । लगतै अर्को बलमा कप्तान शरद भेषवाकर शुन्यमा रन आउट हुन पुगेपछि महेन्द्रनगर संकटमा परेको थियो ।

पाँचौ विकेटका लागि कुशल मल्ल र दिलिप नाथले ५१ रनको साझेदारी गर्दै महेन्द्रनगरको इनिङ उकासेका थिए । अंमरसिंह राउटेला १ ,अभिनास बोहोरा र साहव आलम शुन्यमा आउट भए । महेन्द्रनगरले ५ ब्याट्सम्यान रन आउटको रुपमा गुमाएको थियो ।

अत्तरियाका कप्तान दिपेन्द्रसिंह ऐरीले ४ ओभरमा २४ रन खर्चेर २ विकेट लिए । त्यस्तै र दिपेन्द्र राउतले २ र सन्नी पटेल एक विकेट लिए । रुस्लान डिपिएलको विजेताले ३० लाख र उप विजेताले १२ लाख प्राप्त गर्ने छन् ।