धनगढी (हाम्रो खेलकुद) – तेस्रो संस्करणको रुस्लान धनगढी प्रिमियर लिग (डिपिएल) को एलिमिनेटर खेलमा आज रुपन्देही च्यालेन्जर्स र महेन्द्रनगर युनाइटेडबीच प्रतिस्पर्धा हुँदैछ ।

प्रस्तावित अन्तर्राष्ट्रिय फाप्ला क्रिकेट मैदानमा दिउँसो १२:३० बजेपछि सुरु हुने खेलमा विजेता टोलीले शुक्रबार काठमाडौं गोल्डेन्ससँग क्वालिफायर खेल्ने छ । आज पराजित हुँने टोली बाहिरिने छ । अत्तरिया पहिलो क्वालिफायरमा काठमाडौंलाई पराजित गर्दै फाइनलमा प्रवेश गरि सकेको छ । फाइनल फागुन ११ गते हुने छ ।

शरद भेषावकर कप्तान रहेको महेन्द्रनगरले ५ खेलमा २ मा हार र १ मा जितका साथ ४ अंक जोड्दै चौथो स्थानमा रहेर एलिमिनेटर खेल खेल्न लागेको हो । रुपन्देहीले ५ खेलमा ३ मा जित र २ मा हारका साथ ६ अंक जोड्दै तेस्रो स्थानमा रहेर क्वालिफायरमा स्थान बनाएको थियो ।

जारी प्रतियोगितामा कागजी रुपमा यी दुबै टोली अन्य टोलीको तुलानामा सर्वाधिक बलियो देखिएपनि मैदानमा भने कमजोर प्रर्दशन गरेका छन् । समूह चरणको खेलमा रुपन्देहीले महेन्द्रनगरलाई २ रनले हराएको थियो ।

रुपन्देहीबाट जारी प्रतियोगितामा बिक्रम शोब, ललितसिंह भण्डारी, कृष्ण कार्की, सुमित महर्जन, पुनित मेहेराले राम्रो प्रर्दशन गरि रहेका छन् । महेन्द्रनगरबाट सागर ढकाल, अभिनास बोहोरा, मोहम्मद नाविद, आनन्द सुब्रमनियमको प्रर्दशन सन्तोषजनक छ ।