धनगढी (हाम्रो खेलकुद) – तेस्रो संस्करणको धनगढी प्रिमियर लिगको १३ औं खेलमा रुपन्देही च्यालेनजर्सले धनगढी स्टार्सलाई जितको लागि १ सय ७ रनको लक्ष्य दिएको छ ।

टस जितेर पहिला ब्याटिङ थालेको रुपन्देहीले निर्धारित १५ ओभरमा ९ विकेट गुमाउँदै १ सय ६ रन बनायो । हुस्सु लागेको कारणका निर्धारित समय भन्दा झन्डै डेढ घण्टापछि सुरु हुँदा खेल १५ ओभरमा झारिएको थियो । रुपन्देहीका लागि युवा ब्याट्सम्यान सुमित महर्जनले २४ बलमा समान २ चौका र छक्का प्रहार गर्दै ३३ रनको महत्वपूर्ण योगदान दिए । त्यस्तै विनोद भण्डारीले २५ बलमा २ चौकाको सहयोगमा २४ रन जोडे ।

सोमपाल कामीले पहिलो ओभरको दोस्रो बलमा प्रदीप ऐरीलाई आमिर हायतबाट क्याच गराउँदै शून्यमा आउट गरे । त्यस्तै तेस्रो ओभरको पहिलो बलमा चौका, दोस्रो र तेस्रो बलमा छक्का हानेका बाबर हायतलाई सोमपालले चौथो बलमा भने आमिर हायतबाट क्याच गराउँदै १९ रनमा पेभिलिएन फर्काए । बाबरले १० बलमा १ चौका र २ छक्का प्रहार गरे ।

बाबर आउट भएसँगै रुपन्देहीलाई प्रतिस्पर्धात्मक लक्ष्य सम्म पुर्याउन विनोद भण्डारी र सुमित महर्जनले ५७ रनको महत्वपूर्ण साझेदारी गर्दै इनिङ उकासे । सुमितलाई १० औं ओभरको पाँचौ बलमा रोहन मुस्तफाले सन्दीप रजालीबाट क्याच गराउँदै साझेदारी तोडेका थिए । लगत्तै ११ औं ओभरको अन्तिम बलमा विपिन खत्रीले पवन सरार्फबाट क्याच आउट गराए । भिम सार्की २, पुनित मेहेरा ६ र बिक्रम शोव ११ रनमा आउट भए ।

धनगढीका सोमपाल कामीले ३ ओभरमा २३ रन खर्चेर २ विकेट लिए । त्यस्तै बिपिन खत्री र पवन सरार्फले समान २-२ लिए । रोहन मुस्तफा र आमिर हायत नाममा समान १ विकेट रह्यो । रुपन्देहीलाई प्ले अफमा स्थान बनाउन आजको खेल जित्ने पर्ने हुन्छ । समुह चरणबाटै बाहिरिसकेको धनगढीले कुनै खेल नजितेको हुँदा साखको चिन्ता छ ।