धनगढी (हाम्रो खेलकुद) – तेस्रो संस्करणको धनगढी प्रिमियर लिग (डिपिएल) को आठौं खेलमा विराटनगर किंग्स र महेन्द्रनगर युनाइटेडबीचको खेल वर्षाको कारण रद्द भएको छ । यससँगै दुवै टोलीले १-१ अंक बाँडेका छन्  ।

टस जितेर पहिला ब्याटिङ थालेको विराटनगरले १८.३ ओभरमा ७ विकेट गुमाएको अवस्थामा ८२ रन जोड्दा खेल रोकिएको थियो । निरन्तर वर्षा भएपछि खेल सुचारु हुन सकेन । यससँगै विराटनगरको ३ खेलमा ३ अंक तथा महेन्द्रनगरको ३ खेलमा १ अंक भएको छ ।

वर्षा हुनुअघि खेलमा विराटनगरका कुनैपनि ब्याट्सम्यान राम्रो प्रर्दशन गर्न सकेनन् । करण केसी ९ र साम्सद शेख १ रनमा अविजित छन् । चौथो ओभरको दोस्रो बलमा ओपनर आशिफ शेखलाई सागर ढकालले अभिनास बोहोराबाट क्याच गराउँदै खाता खोल्न नदिई पेभिलिएन फर्काए । छैटौं ओभरको पाँचौ बलमा असद उल्लाह खान १९ रनमा कुशल मल्लको रन आउटको शिकार भए । २३ बलमा ३ चौका र १ छक्का प्रहार गरे ।

आठौं ओभरको तेस्रो बलमा कुशल भुर्तेललाई शरद भेषवाकरले ३ रनमा नर आउट गराए । लगतै यसै ओभरको पाँचौ बलमा हरि शंकर शाह ५ रनमा क्याच आउट भएपछि विराटनगर केहि दवावमा परेको थियो । १६ ओभरको दोस्रो बलमा पृथु वास्कोटाले १४ र अर्को बलमा तृथ दास १२ रनमा क्याच आउट भए । अभिनास यादव पनि १३ रनमा रन आउट भए । विराटनगरका ब्याट्सम्यानमा रन जोड्दा तालमेल गर्न नसक्दा रन आउट हुनुको साथै खराव शट खेल्दा क्याच आउटको शिकार बनेका थिए ।

महेन्द्रनगरका लागि सागर ढकालले ४ ओभरमा १ मेडन सहित २१ रन खर्चेर ३ विकेट लिए । मोहम्मद नाविदले १ विकेट हात पारे ।