काठमाडौं (हाम्रो खेलकुद) – क्रिकेट खेलाडी संघ नेपाल (सिप्यान) को आयोजनामा प्रथम एनसीसीएस–सिप्यान क्रिकेट अवार्ड फागुन तेस्रो साता आयोजना हुने भएको छ ।

आयोजक सिप्यानले बुधबार राजधानीमा पत्रकार सम्मेलनको आयोजना गर्दै एनसीसीएस–सिप्यान क्रिकेट अवार्ड फागुन २१ गते हुने जानकारी गराएको हो । नेशनल कलेज फर कम्प्युटर स्टडिज (एनसीसीएस) को मुख्य प्रायोजनमा हुने क्रिकेट अवार्डमा विभिन्न ५ विधा समावेश गरिएको छ ।
वर्ष क्रिकेट खेलाडी (पुरुष), वर्ष क्रिकेट खेलाडी (महिला), उदियमान वर्ष खेलाडी, वर्ष उत्कृष्ट क्षण र लाइफटाइम अचिभमेन्ट अवार्ड गरी ५ विधा समावेश गरिएको छ ।

अवार्डका लागि सिप्यानले बुधबारै नेशनल कलेज फर कम्प्युटर स्टडिज (एनसीसीएस) सँग मुख्य प्रायोजन सम्झौता गरेको छ । सम्झौतामा सिप्यानका अध्यक्ष डाक्टर मनिषराज पाण्डे र एनसीसीएसका प्रधानाध्यापक शंकरराज जोशीले हस्ताक्षर गरे । एक वर्षे सम्झौताअनुसार अवार्डका लागि सबै खर्च एनसीसीएसले बेहोर्नेछ ।

अवार्डका लागि खेलाडी छनोट गर्न एक प्राविधिक समिति बनाइने र तोकिएको मापदण्डको आधारमा उक्त प्राविधिक समितिले सिफारिस गरेको खेलाडी पुरस्कृत हुने सिप्यानले जनाएको छ । नेपाली क्रिकेटको पुरानो पुस्तालाई प्रतिनिधित्व गर्ने एक पुराना क्रिकेट खेलाडीलाई लाइफ टाइम अचिभमेन्ट अवार्डबाट सम्मानित गरिनेछ ।

वर्ष पुरुष खेलाडीले १ लाख ३२ हजार रुपैयाँ (करसहित) प्राप्त गर्नेछन् । वर्ष महिला खेलाडी, उदियमान खेलाडी, वर्ष उत्कृष्ट क्षण र लाइफटाइम अचिभमेन्ट अवार्डको विजेताले समान ६६ हजार रुपैयाँ हात पार्नेछन् ।

सिप्यानका अध्यक्ष डाक्टर मनिषराज पाण्डेले वर्ष पुरुष र महिला खेलाडीको पुरस्कार राशिमा पछिल्लो समय महिला क्रिकेट सक्रिय नभइरहेको अवस्थाका कारण पुरस्कार राशीमा केही भिन्नता देखिएको र आगमी दिनमा यसबारे पुनर्विचार हुने बताए ।

यस्तै वर्ष उत्कृष्ट क्षणका पुरस्कारका लागि विभिन्न केहि विकल्प छनोट गरिने र पब्लिक भोटिङमार्फत विजेता घोषणा गरिने सिप्यानका महासचिव पारस खड्काले जानकारी गराए ।