धनगढी (हाम्रो खेलकुद) – सर्वाधिक धनराशीको तेस्रो संस्करणको धनगढी प्रिमियर लिग (डिपिएल)का लागि घरेलु टोली धनगढी स्टार्सले विदेशी खेलाडी परिवर्तन गरेको छ ।

यसअघि धनगढीले घोषणा गरेको भारतीय खेलाडी सागर त्रिवेदी नखेल्ने भएका छन् । धनगढीका कप्तान सोमपाल कामीका अनुसार भारतीय क्रिकेट बोर्डका कारण सागर नखेल्ने भएका हुन् । यसअघि धनगढीले विदेशी खेलाडीको रुपमा यूएईका कप्तान रोहन मुस्तफा र भारतीय सागर खेल्ने सार्वजनिक गरेको थियो ।

सागर नआउने भएपछि धनगढीले विदेशी उनको स्थानमा यूएईका तीब्र गतिका बलर आमिर हायतलाई भित्र्याएको कप्तान सोमपालले जानकारी दिए । हायतले तल्लो क्रममा ब्याटिंग पनि गर्ने गर्दछन् । उनले नेपालविरुद्ध पहिलो ओडीआईमा यूएईलाई जित दिलाउन म्यान अफ द म्याच प्रदर्शन गरेका थिए । बलिङमा ३ विकेट लिएका उनले नटआउट २४ रन जोड्दै टोलीलाई जितसम्म डोर्याएका थिए ।

तीब्र गतिका बलर हायातले यूएईबाट ९ ओडीआई, ४ टि-२० आई र १६ लिष्ट ए खेलेका छन् । हायत पहिलो पटक नेपाली फ्रेन्चाइज लिग खेल्न लागेका हुन् । नेपालसँगको ओडीआई र टि-२० सिरीजमा हायतले उत्कृष्ट प्रर्दशन गरेका थिए । ओडीआई सिरीजमा ६ र टि-२० श्रृंखलामा हायतले ४ विकेट लिएका थिए । धनगढीले पहिलो काठमाडौं गोल्डेन्सँग माघ २८ मा खेल्ने छ । धनगढी गत वर्षको च्याम्पियन टोली समेत हो ।

धनगढी स्टार्स टोली :
सोमपाल कामी (कप्तान), पवन सर्राफ, सुनील धमला, सौरभ खनाल, दिपेश श्रेष्ठ, अमित श्रेष्ठ, विपिन खत्री, हरि बहादुर चौहान, राजु रिजाल, रोबिन क्षेत्री, सन्दिप रजाली, धिरज शाही, कृष्ण ऐर, रोहन मुस्तफा (यूएई) र आमिर हायत (यूएई)