काठमाडौं (हाम्रो खेलकुद) – पाकिस्तानसँगको पहिलो अन्तर्राष्ट्रिय महिला नेत्रहीन क्रिकेट सिरिज नेपालले ४– ० ले जितेको छ । सोमवार भएको पाँचौ तथा अन्तिम टी २० अन्तर्राष्ट्रिय खेलमा घरेलु टोली पाकिस्तान महिला नेत्रहीन क्रिकेट टिमलाई १० विकेटले हराउँदै नेपालले सिरिज ४–० ले जित्न सफल भएको हो ।

यसअघि पहिलो र तेस्रो खेल समान १० विकेटले जितेको नेपालले चौथो खेल ९ विकेटले जितेको थियो । दोस्रो खेल भने वर्षाका कारण रद्ध हुन पुगेको थियो । इस्लामावादस्थित शालिमार क्रिकेट ग्राउण्डमा भएको अन्तिम खेलमा मनकेसी चौधरीले अर्धशतकमा १ सय २७ रनको लक्ष्य नेपालले मात्र १०.४ ओभरमा सहजै पुरा गर्यो । मनकेसीले ३६ बलमा १५ चौकाको प्रहार गर्दै ८१ रनमा अविजित रहिन् । आशा रेगामी ३३ बलमा अविजित ३२ रन जोडिन्। १ सय २७ रनको साझेदारी अन्तर्राष्ट्रिय महिला क्रिकेटमा यो कुनै पनि विकेटको लागि उच्च साझेदारी पनि हो।

त्यसअघि टस जितेर पहिला ब्याटिङ थालेको पाकिस्तानले निर्धारित २० ओभरमा ६ विकेटको क्षतिमा १२६ रन बनाएको थियो। पाकिस्तानका लागि ओपनर निशा बुकसले सर्वाधिक ४० र तयावा फतिमाले २७ रन बटुले । नेपाली कुनै पनि बलरले विकेट लिन सकेनन् । पाकिस्तानको सबै विकेट नेपालले रनआउट गराएको थियो । विकेटकिपर मनकेसिले ३ तथा बिनिता पुनले २ रनआउट गरिन् ।

नेपालको लागि दोस्रो अर्धशतक प्रहार गरेकी मनकेसी प्लेअर अफ दि म्याच घोषित भइन् । उनले २५ हजार हात पारिन्। यस्तै भ्यालुएबल प्लेअर बनेकी आशाले ५ हजार हात पारिन् । सिरीज जितेको नेपालले १ लाख पाकिस्तानी नगद हात पार्‍यो। पाकिस्तानी टोलीले भने ५० हजारमै चित्त बुझायो ।

यसैगरी सिरिजभर उत्कृष्ट प्रदर्शन गरेकी नेपालकी मनकेसी बी टु क्याटेगोरीतर्फ उत्कृष्ट बनिन् । यस्तै नेपालकै मुना अर्याले बी वान क्याटेगोरीतर्फ र नेपालकी विनिता पुन बी थ्री क्याटेगोरीतर्फ उत्कृष्ट घोषित भइन् । यस्तै पाकिस्तानी टिमका किरण रफिक उत्कृष्ट विकेट किपर घोषित भइन् ।