काठमाडौं (हाम्रो खेलकुद)– संयुक्त अरब इमिरेट्स (यूएई) विरुद्धको तीन एकदिवसीय र ३ टी–२० अन्तराष्ट्रिय क्रिकेट श्रृंखला जितेर आज स्वदेश फर्केको नेपाल क्रिकेट टोलीलाई त्रिभुवन विमानस्थलमा भव्य स्वागत गरिएको छ ।

साँझ चार बजे विमानस्थल आईपुगेको टोलीको स्वागतका लागि खेलसम्बद्ध पदाधिकारीसँगै सयौंको संख्यामा समर्थकहरुको उपस्थिति थियो । नेपाली टोलीको स्वागतको लागि युवा तथा खेलकुद मन्त्री जगतबहादुर विश्वकर्मा,राखेप सदस्य सचिव केशव कुमार विष्ट, राष्ट्रियसभा अध्यक्ष गणेशप्रसाद तिमिल्सिना लगायतको टोली विमानस्थल पुगेका थिए ।

स्वागत गर्न विमानस्थल पुगेका समर्थकले नेपाली क्रिकेट टोलीको जयजयकार गर्दा खेलमन्त्रीलाई भने मुर्दावाद भन्दै नारा बाजी लगाए । नेपाली टोलीलाई रातो कार्पेट र फुलमालाले स्वागत गरिएको थियो । त्यस्तै विमानस्थलमै अध्यक्ष तिमिल्सिनाले खेलाडी तथा अफिसियलहरुलाई सम्मानस्वरुप जनही १०–१० हजार रुपैयाँ पनि प्रदान गरे ।

नेपाली टोलीमा लेग स्पिनर सन्दीप लामिछाने फर्किएका छैनन् । सन्दीप बिग बास लिगका लागि आजै अष्ट्रेलिया प्रस्थान गर्ने व्यवस्थापक रमन शिवाकोटीले जानकारी गराए । टोलीका प्रमुख प्रशिक्षक जगत टमटाले सबैको मेहिनतले सिरीज जित्न सफल रहेको बताए । यूएईविरुद्ध नेपालले टि–२० सिरिज २–१ र ओडीआई सिरिज पनि २–१ ले नै इतिहास रचेको थियो ।