हेमिल्टन (एजेन्सी)– तीब्र गतिका बलर ट्रेन्ट बोल्टले घातक बलिङ गर्दै ५ विकेट लिएपछि भारतसँगको पाँच ओडिआई सिरीजको चौथो खेलमा न्युजिल्यान्ड ८ विकेटले विजयी भएको छ । बिहीबार भएको चौथो खेलमा भारतले प्रस्तुत गरेको ९३ रनको सामान्य लक्ष्य न्युजिल्यान्डले १४.४ ओभरमा २ विकेटको क्षतिमा सहजै पुरा गर्यो ।

घरेलु टोलीका लागि रोस टेलर २५ बलमा ३ छक्का र २ चौका प्रहार गर्दै ३७ रनमा अविजित रहे । त्यस्तै ओपनर नरी निकोलस ४२ बलमा ४ चौका र १ छक्का प्रहार गर्दै ३० रनमा अविजित रहे । कप्तान केन विलियम्सन ११ र मार्टिन गुप्टिल १४ रनमा आउट भए । भारतका लागि भुवनेश्वर कुमारले २ विकेट लिएपनि हार टार्न सकेनन् ।

त्यस अघि टस हारेर ब्याटिङ गरेको भारत ट्रेन्ट बोल्टको घातक बलिङ सामु ३०.५ओभरमा अल आउट हुँदै ९२ रनमा समेटियो । भारतका लागि युजवेन्द्र चाहाल ३७ बलमा ३ चौका प्रहार गर्दै सर्वाधिक १८ रनमा अविजित रहे । कप्तान विराट कोहली र महेन्द्रसिंह धोनीलाई आराम दिएको खेलमा भारतका ७ ब्याट्सम्यानले दोहोरो अंकमा रन बटुल्न सकेनन् ।

हार्दिक पान्ड्या १६,शिखर धवन १३ र कुलदिप यादवले १५ रन बनाउन सके । कप्तान रोहित शर्मा ७ र यसै खेलबाट भारतीय टिममा डेब्यू गरेका युवा ब्याट्सम्यान शुवमन गिल ९ रनमा आउट भए । भारतका आम्बाती रायडु र दिनेश कार्तिकले रनको खाता खोल्न सकेनन् ।

न्युजिल्यान्डका बोल्टले १० ओभरमा ४ मेडन सहित २१ रन खर्चेर ५ विकेट लिए । त्यस्तै कोलन डी ग्रान्डहोमले पनि १० ओभरमा २ मेडन सहित २६ रन खर्चेर ३ तथा जेम्श निशम र टोड एस्टलले समान १ विकेट लिए । श्रृखंलामा भारत ३–१ ले अगाडि छ । सिरिजको अन्तिम खेल आइतबाट हुनेछ ।