सुबास हुमागाईं, दुबई

नेपाली राष्ट्रिय क्रिकेट टोलीले ऐतिहासिक ओडीआई सिरिजको जितपछि यूएईविरुद्ध तीन खेलको ट्वान्टी-२० सिरिज पनि खेल्दैछ । पहिलो खेल बिहिबार दुबईस्थित आईसीसी एकडेमी मैदानमा नेपाली समयानुसार दिउँसो ३:४५ बजे सुरु हुनेछ ।

खेलको अघिल्लो दिन युवा स्पिनर सन्दिप लामिछानेले आफूले पछिल्लो समय ब्याटिङमा पनि ध्यान दिइरहेको बताए । ‘ पछिल्लो समय ब्याटिङमा पनि अलि ध्यान दिन थालेको छु । इनिङको अन्तिमतिर क्रिजमा आएर रन जोड्दा टोलीलाई र व्यक्तिगत आफूलाई फाइदा हुन्छ । यसले गर्दा हामीले बलिङमा धेरै रन रोक्न पनि सहयोग पुग्छ,’ उनले भने । उनले ब्याटिङमा पाएको समय सदुपयोग गर्दा दिर्घकालिन रुपमा टोलीलाई नै फाइदा पुग्ने पनि बताए ।

सन्दीपले नेपालको ओडीआई मान्यतासम्मको यात्रामा बलिङ मात्र नभएर ब्याटिङमा पनि योगदान दिएका थिए । विशेषत: करण केसीले क्यानाडाविरुद्ध अपत्यारिलो ब्याटिङ गर्दा सन्दीपले नै उनलाई अर्को एण्डबाट साथ दिएका थिए । यूएईविरुद्ध ओडीआई सिरिजमा पनि सन्दीपले ब्याटिङमा राम्रो प्रदर्शन गरे ।

पहिलो खेलमा नेपालले कमजोर ब्याटिङ प्रदर्शन गर्दा पनि सन्दीपले १५ रन जोडेका थिए । उनले नेपालले लगातार विकेट गुमाइरहेको अवस्थामा धैर्यतापूर्वक ब्याटिङ गर्दै । दोस्रो खेलमा उनले १० बलमा २ चौकासहित नटआउट १४ रन जोडे । अबको टि-२० सिरिजमा पनि सन्दीपले आवश्यक परेको खण्डमा टोलीका लागि रन बटुल्ने क्षमता रहेको देखाएका छन् ।

टि-२० सिरिजको अघिल्लो दिन बोल्दै सन्दिप :