काठमाडौं (हाम्रो खेलकुद) – फिल्डिङ बादशाह दक्षिण अफ्रिकाका क्रिकेटर जोन्टी रोड्स रुस्लान धनगढी प्रिमियर लिग (डीपीएल) को तेश्रो संस्करणको गुडविल एम्बासडर नियुक्त भएको छ । रोड्स लिग आयोजना अवधिभर धनगढीमा नै रहने र प्रतियोगिता दौरान बिभिन्न कार्यक्रमहरुमा सरिक हुनेछन् ।

दक्षिण अफ्रिकाको लागि ५२ टेस्ट तथा २४५ एकदिवसीय खेलेका ४९ वर्षीय रोड्स आफ्नो फिल्डिंगको कारण विश्व प्रसिद्ध छन् । सन् १९९२ को एकदिवसीय बिश्वकपको दौरान पाकिस्तान क्रिकेटर इन्जमाम उल हकको रन आउटको कारण प्रख्यात रोड्सलाई त्यतिबेला एउटा पत्रिकाले ‘के यो चरा हो ? के यो जहाज हो ? हैन, यो जोन्टि हो’ लेखेको प्रसंग चर्चित मानिन्छ । हावामा उड्दै उनले गरेको रन आउट बिश्व क्रिकेटमा धेरै याद गरिने क्षण मध्येको एक हो ।

रोड्स इन्डियन प्रिमियर लिग आईपीएल टिम मुम्बई इन्डियन्सको २०१७ सम्म लगातार ९ सिजन फिल्डिङ प्रशिक्षक रहेका जोन्टीले श्रीलंका, दक्षिण अफ्रिका, केन्या जस्ता टिमहरुको प्रशिक्षण सम्हालिसकेका छन् ।

प्रतियोगिताको गुडविल एम्बासडरको रुपमा जोन्टिको आगमनले अन्तर्राष्ट्रिय क्रिकेट परिषद (आईसीसी) र विश्व क्रिकेट जगतको ध्यान प्रतियोगितामा तानिने विश्वास लिएका आयोजक धनगढी क्रिकेट एकेडेमी (डिसिए) का अध्यक्ष सुवास बहादुर शाहीले विश्वास लिएका छन् ।
उनको उपस्थितिले खेलाडी र खेल प्रेमीहरुलाई समेत उत्साह र प्रेरणा मिलने बताउदै जोन्टीलाई रुस्लान डीपीएलमा आबद्ध गराउन महत्वपूर्ण भूमिका खेल्ने ‘स्पोर्ट्स एड’ लाई धन्यवाद दिए ।

प्रतियोगिता दौरान जोन्टी सीवाईसी अत्तरिया टिमको मेन्टरको रुपमा समेत रहनेछ ।
यस्तै सीवाईसी अत्तरियाले रायन मरुनलाई टिमको प्रशिक्षकको रुपमा समेत नियुक्त गरेको छ । मरुन वेस्ट इन्डिज क्रिकेट टिमका पुर्व फिल्डिङ प्रशिक्षक समेत हुन् ।