सुबास हुमागाईं, दुबई

नेपाली राष्ट्रिय क्रिकेट टोलीका कप्तान पारस खड्काले एकदिवसीय अन्तर्राष्ट्रिय (ओडीआई) मान्यता प्राप्त गरेपछि अब नेपाली खेलाडीबाट शतक पनि चाडैं देख्न पाइने आशा व्यक्त गरेका छन् । यूएईविरुद्ध जारी ३ खेलको ओडीआई सिरिजको निर्णायक खेलको पूर्वसन्ध्यामा बोल्दै पारसले यस्तो अभिव्यक्ति दिएका हुन् । १-१ को बराबरीमा रहेको सिरिजको अन्तिम खेल सोमबार हुँदैछ ।

नेपालले पहिलो ओडीआई शतक कहिले देख्न पाउँछ भन्ने प्रश्नमा पारसले ब्याटिङ राम्रो भइरहेकाले चाडैं देख्न पाइने बताए । ‘ आशा छ हामीले चाडैं शतक देख्न पाउँछौं । ब्याटिङबाट राम्रो प्रदर्शन भइरहेको हेर्दा लामो समय नलाग्ला । अहिले बनिरहेको ५० रन, ३० रनको इनिङसलाई ठूलो स्कोरमा परिणत गर्न जरुरि छ,’ उनले भने ।

नेपाललाई बलियो एसोसिएट राष्ट्रको रुपमा अगाडी बढाउन पनि ब्याट्सम्यानको शतक र बलरहरुको ५ विकेट प्रदर्शन महत्त्वपूर्ण हुने बताए । ‘ हामीबाट धेरै अपेक्षा गरिएको छ । अन्तर्राष्ट्रिय क्षेत्रमा बलियो प्रदर्शन गर्न ब्याट्सम्यानको शतक, बलरहरुको ५ विकेट, फिल्डरबाट रनआउट र क्याचलायत सबै पक्षमा उत्कृष्ट प्रदर्शन चाहिन्छ,’ उनले थपे, ‘यदि भोलि नै शतक आउँछ भने त्यो उत्कृष्ट हुन्छ । तर अन्त्यमा शतक भन्दापनि टोलीको जित महत्त्वपूर्ण हो । यदि शतक बनाएर टोली पराजित हुन्छ भने त्यसको महत्त्व हुँदैन ।’

पारसले पहिलो सिरिज जित्न टोली एकतृत भएर लागेको बताए । ‘हामी पहिलो ओडीआई सिरिज जित्ने संघारमा छौं । यसका लागि सबैले एकतृत भएर मिहिनेत गर्छौं । यसअघिको नतिजा वास्ता नगरि भोलि नयाँ खेलको लागि जुटेका छौं । हामीले अघिल्लो खेलको लयलाई निरन्तरता दिँदै जित हासिल गर्ने प्रयासमा हुनेछौं,’ उनले भने ।

खेलको पूर्वसन्ध्यामा कप्तान पारस खड्कासँग लिइएको अन्तर्वार्ता :