सुबास हुमागाईं, दुबई

यूएईविरुद्ध दोस्रो ओडीआईका म्यान अफ द म्याच घोषित सोमपाल कामीले व्यक्तिगत प्रदर्शनभन्दा टोलीको जितमा योगदान दिन पाउँदा खुसी लागेको बताएका छन् । उनले ५ विकेट लिएपछि नेपालले फराकिलो जित दर्ता गर्दै ३ खेलको सिरिज १-१ को बराबरीमा ल्याएको छ ।

जितपछि बोल्दै सोमपालले व्यक्तिगत सफलता भन्दापनि टोलीको जितमा योगदान दिन पाउँदा धेरै खुसी लागेको बताए । ‘५ विकेट लिनुभन्दा टोलीलाई जितसम्म पुर्याउन पाउँदा धेरै खुसी लाग्छ । पहिलो खेलमा पराजित भएपछि नराम्रो लागेको थियो । ओडीआई स्तरमा खेल्न केहि दबाब पनि थियो । आज जित दर्ता गरेपछि मनोबल बढेको छ,’ उनले भने ।

सोमपालले खेलको अवस्था अनुसार आफूले पाउने जिम्मेवारीलाई निभाउन सधैं तत्पर रहने बताए । ‘मलाई टोलीमा जुन भूमिका दिइएको छ । त्यसलाई मैले जिम्मवारीपुर्वक निर्वाह गर्ने हो । हिजो ब्याटिङको जिम्मेवारी पूरा गरें, आज बलिङमा प्रदर्शन गर्न सकें । तर हिजो खेल हिजो सकियो र आजको खेल पनि सकियो । अब अर्को खेल निकै महत्त्वपूर्ण छ त्यसैले हाम्रो ध्यान त्यसैतर्फ रहनेछ,’ उनले भने ।

सोमपालले रोहितकुमार पौडेलको ब्याटिङको प्रशंसा गर्दै उनीसँग मैदानबाहिर पनि राम्रो सम्बन्ध रहेको बताए ।

हेर्नुहोस् सोमपालसँग जितपछि गरिएको रोमांचक कुराकानी :