काठमाडौं (हाम्रो खेलकुद) – तेस्रो संकरणको रुस्लान धनगढी प्रिमियर लिग(डीपीएल) क्रिकेट टी–२० प्रतियोगितालाई अन्तर्राष्ट्रिय क्रिकेट काउन्सिल(आइसिसी)को मान्यता दिएको छ ।

धनगढी क्रिकेट एकेडेमीले बुधबार एक विज्ञप्ति जारी गर्दै आइसीसीले मान्यता दिएको जनाएको हो । देशको क्रिकेटको सर्वोच्च निकाय नेपाल क्रिकेट संघ तीन वर्षदेखी निलम्बनमा छ ।

यस्तो अवस्थामा निलम्बित देशहरूमा हुने ठूला प्रतियोगिताका लागि आईसीसीबाट स्विकृति लिनुपर्ने प्रावधान छ । आइसिसीले मान्यतासँगै डिपिएल प्रतियोगिताबारे आफ्ना सम्पूर्ण सदस्य राष्ट्रहरुलाई समेत जानकारी गराइसकेको उल्लेख छ ।

आईसीसीको मान्यता पाएसँगै अब सबै खेलाडीले सम्बन्धित राष्ट्रको बोर्डको एनओसी (नो अब्जेक्सन लेटर) पाएपछि डीपीएल खेल्न पाउछन् । दोस्रो संकरणमा २० हजार डलर तिरेर मान्यता पाएको थियो । यस वर्ष रकम खुलाएको छैन । यसै अनुरुप यस अघि एभरेष्ट प्रिमियर लिग र पोखरा प्रिमियर लिगले पनि आईसीसीको मान्यता लिएका थिए ।

डिपिएल आगमी माघ २६ देखी फागुन ११ सम्म धनगढीको फाप्लामा हुँदै छ । डिपिएलमा धनगढी स्टार्स, महेन्द्रनगर युनाइटेड, सिवाइसी अत्तरिया, विराटनगर किंग्स, रुपेन्देही च्यालेन्जर्स र काठमाडौं गोल्डन्स गरि ६ वटा फ्रेन्चाइजी टोलीले रहेका छन् ।