डर्बन (एजेन्सी) –एन्डिल फेहलुकवेओलेले उत्कृष्ट अलराण्डर प्रर्दशन गरेपछि पाकिस्तानविरुद्धको दोस्रो वान डेमा मंगलबार घरेलु टोली दक्षिण अफ्रिका ५ विकेटले विजयी भएको छ । २ सय ४ रनको लक्ष्य पछ्याएको दक्षिण अफ्रिकाले ४२ ओभरमा ५ विकेटको क्षतिमा २ सय ७ रन जोड्दै सहज जित हासिल गर्यो ।

घरेलु टोलीका लागि रस्सी भान डर दुसेन १ सय २३ बलमा ९ चौका प्रहार गर्दै ८० रनमा अविजित रहे । एन्डिल ८० बलमा ७ चौका र २ छक्का प्रहार गर्दै ६९ रनमा अविजित रहे । त्यस्तै डेविड मिलर ३१ रन जोडे । पाकिस्तानका लागि युवा खेलाडी शाहिन शाह अफ्रिदीले ३ र शादव खानले २ विकेट लिए ।

त्यस अघि टस हारेर पहिला ब्याटिङ थालेको ४५.५ ओभरमा अल आउट हुँदै २ सय ३ रनमा समेटियको थियो । १ सय १२ रन बनाउन ८ विकेट गुमाएको पाकिस्तानका लागि हसन अली र कप्तान सरफराज अमिदले नवौं विकेटका लागि ९० रनको महत्वपूर्ण साझेदारी गर्दै सम्मानजनक लक्ष्य सम्म पुर्याए ।

हसनले ४५ बलमा ५ चौका र ३ छक्का प्रहार गर्दै ६९ रन बनाए । त्यस्तै अमिद ४१,शादब खान १८, सोएव मालिक २१,वावर आजम १२ र फकार जमानले २६ रन बनाउन बाहेक अन्य कुनैपनि ब्याट्सम्याले दोहोरो अंकमा रन जोड्न सकेनन् । दक्षिण अफ्रिकाका एन्डिलले ९.५ ओभरमा २ मेडन सहित २२ रन खर्चेर ४ विकेट लिए ।

त्यस्तै तबरेजÞ शम्सीले ३ र कागिसो रबाडाले २ विकेट लिए । यो जितसँग पाँच वान डे को श्रृंखला १–१ को अवस्थामा पुगेको छ । पहिलो खेल पाकिस्तानले ५ विकेटले जितेको थियो । तेस्रो खेल शुक्रबार हुनेछ ।