सुनसरी (हाम्रो खेलकुद)– नेपाल आर्मीले सुनसरीको इनरुवामा जारी मनमोहन स्मृति एक दिवसीय राष्ट्रिय क्रिकेट प्रतियोगिताको उपधि जितेको छ । शनिबार पुलिसलाई ८३ रनले पराजित गर्दै उपाधि उचालेको हो । विजेताले टोली आर्मीले ४ लाख १ हजार नगद पुरस्कार पाएको छ ।

उपविजेता पुलिसले २ लाख १ हजारमा चित्त बुझायो । २ सय ५० रनको लक्ष्य पक्ष्याएको पुलिस ४२.५ ओभरमा अल आउट हुँदै १ सय ६६ रनमा समेटियो । पुलिसका लागि योगेन्द्र सिंह कार्कीले ५१ रन बनाउन बाहेक अन्य कुैन पनि ब्याट्सम्यानले राम्रो प्रर्दशन गर्न सकेनन् ।

हिमान्शु दत्त २९,अमित श्रेष्ठ २५,प्रेम तामाङ १४,दिपेश श्रेष्ठ १७ र सागर ढकालले १४ रन बनाए । पुलिसलाई सस्तैमा रोक्न आर्मीका आहव आलम र कुशल मल्लले समान तीन विकेट लिए ।

त्यस अघि टस जितेर पहिला ब्याटिङ थालेको आर्मीले ५० ओभरमा ८ विकेटको क्षतिमा २ सय ४९ रन बनायो । आर्मीका लागि राजेश पुलामी मगरले १ सय २८ बलमा ५ चौकाको सहयोगमा ६९ रन बनाए ।

त्यस्तै कुशल मल्ल ४९,बिनोद भण्डारी २६,रोहित कुमार पौडेल १४, बिक्रम शोव २० र भिम सार्कीले १५ रनको योगदान दिए । पुलिसका लागि दिपेश श्रेष्ठ ३ र राम नरेश गिरीले २ विकेट लिए ।

प्रतियोगिताको उत्कृष्ट खेलाडी दिलिप नाथले चुनिए । नाथले ५१ हजार प्राप्त गरे । प्रतियोगिताको उत्कृष्ट बलर सागर ढकाल र ब्याट्सम्यान भिम सार्की घोषित भए । दुबैले समान २० हजार १ सय नगद पुरस्कार पाए ।