सुनसरी (हाम्रो खेलकुद)– नेपाल आर्मी सुनसरीको इनरुवामा जारी मनमोहन स्मृति एक दिवसीय राष्ट्रिय क्रिकेट प्रतियोगिताको फाइनलमा प्रवेश गरेको छ ।

शुक्रवार सेमिफाइनलमा प्रदेश १ लाई ६ विकेटले पराजित गर्दै फाइनलमा पुगेको छ । उपाधिको लागि आर्मीले शनिबार पुलिससँग प्रतिस्पर्धा गर्नेछ । पुलिस प्रदेश ७ लाई २ सय रनले हराउँदै फाइनलमा पुगि सकेको छ ।

प्रदेश १ ले प्रस्तुत गरेको १ सय १० रनको लक्ष्य आर्मीले १९.२ ओभरमा ४ विकेटको क्षतिमा पुरा गर्यो । आर्मीको जितमा रोहित कुमार पौडेलले ४४ बलमा ७ चौका र ३ छक्का प्रहार गर्दै ५८ रनमा नट आउट रहे । त्यस्तै राजेश पुलामी २३ रनमा अविजीत रहँदा कुशल मल्ल र विनोद भण्डारी समान ४ तथा राजु रिजालले ५ रन जोडे । प्रदेश १ का लागि मनोज मण्डलले २ र पुष्प थापाले १ विकेट लिए ।

त्यस अघि टस हारेर ब्याटिङ थालेको प्रदेश एक २५.४ ओभरमा अल आउट हुँदै १ सय ९ रनमा समेटियो । प्रदेश १ का लागि रबि रोयले सर्वाधिक २२ रनको योगदान दिए । मुकुन्द यादव १७ र पुष्प थापा १९ रन जोड्न बाहेक अन्य कुनै पनि ब्याट्सम्यानले राम्रो प्रर्दशन गर्न सकेनन् । प्रदेश १ लाई सस्तैमा रोक्न आर्मीका हरि चौहानले ५ ओभरमा मात्र ९ रन खर्चेर ४ विकेट लिए । त्यस्तै साहव आलम, जितेन्द्र मुखिया, विक्रम शोव, कुशल मल्ल र रोहित कुमार पौडेलले समान १–१ विकेट लिए ।

विजेताले टोलीले ४ लाख १ हजार नगद पुरस्कार पाउनेछ । उपविजेताले २ लाख १ हजार तथा सेमिफाइनलमा पुग्ने टोलीले २५/२५ हजार पाउने छन् । प्रतियोगिताको उत्कृष्ट खेलाडीले ५१ हजार प्राप्त गर्दा उत्कृष्ट बलर र ब्याट्सम्यानले २० हजार १ सय नगद पुरस्कार पाउने छन् । त्यस्तै अनुशासित टिमले १५ हजार र उदयमान टिमले १० हजार नगद पाउने छन् ।