सुनसरी (हाम्रो खेलकुद) – सुनसरीको इनरुवामा जारी मनमोहन स्मृति एक दिवसीय राष्ट्रिय क्रिकेट प्रतियोगितामा प्रदेश ७ ले प्रदेश ५ लाई १ सय १८ रनको फराकिलो अन्तरले पराजित गरेको छ ।

प्रदेश ७ ले प्रस्तुत गरेको २ सय ४५ रनको लक्ष्य पछ्याएको प्रदेश पाँच २९ औं ओभरमा १ सय २६ रनमा अल आउट भयो । प्रदेश ५ का लागि कृष्ण कार्कीले सर्वाधिक ३६ रन बनाउन बाहेक अन्य कुनै ब्याट्सम्यान सम्झनयोग्य प्रर्दशन गर्न सकेनन् । प्रदेश ५ का अन्य सन्दीप सुनार ९, सुवेन्दु पाण्डे ११, सन्दीप रजाली १४, विक्रम भुषालले ११ र रुपेश कुर्मीले ८ रन जोडे ।

प्रदेश ७ को फराकिलो जित दिलाउन विक्रम ठगुन्नाले ह्याट्रिकसहित ८.३ ओभरमा २ मेडन सहित ३८ रन खर्चेर ४ विकेट लिए । त्यस्तै नारायण जोशी र शेर मल्लले समान दुई विकेट लिदा खड्क बोहरा र नरेन्द्र साउदले समान एक विकेट हात पारे ।

त्यस अघि टस जितेर पहिला ब्याटिङ थालेको प्रदेश ७ ले निर्धारित ५० ओभरमा ८ विकेटको क्षतिमा २ सय ४४ रन बनाएको थियो । उस्का लागि लोकेश बमले ६२ बलमा ४ चौका र ३ छक्का प्रहार गर्दै ६८ रन बनाए । रोशन अधिकारीले १ सय २ बलमा ५ चौका र १ छक्का प्रहार गर्दै ५९ रन बटुले ।

प्रदेश ७ का अन्य विपिन रावल २४, नारायण जोशीले २२, खड्क बोहरा र विजय रानाले समान २१ रन को योगदान दिए । प्रदेश पाँचका लागि मान बहादुर थापाले ३,रुपेश कुर्मी र बिक्रम भुषालले समान दुई विकेट लिदा अनिल खरेलले आफ्नो नाममा १ विकेट लेखाए ।

बुधबार प्रदेश ७ र भारतीय क्लव सुफलबीच खेल हुने छ । भोलीको खेलमा प्रदेश ७ विजयी भए सोझै सेमिफाइनलमा पुलिससँगको भेट पक्का गर्ने छ । पराजित भए प्रदेश पाँच, सुफल र ७ मध्य एक नेट रनरेटका आधारमा सेमिफाइनल तय हुने छ । त्यस्तै अर्को सेमिफाइनलमा नेपाल आर्मीले प्रदेश १ को सामना माघ ४ गते गर्ने छ ।