एजेन्सी – कप्तान विराट कोहलीको शतकसँगै अस्ट्रेलियाविरुद्ध दोस्रो वान डे खेलमा पाहुना टोली भारत ६ विकेटले विजयी भएको छ । योसँगै तीन वान डे श्रृंखला १–१ को अवस्थामा पुगेको छ । तेस्रो तथा निर्णयक खेल आगमी १८ जनवरीमा मेलवर्नमा हुने छ । पहिलो वान डे खेलमा अस्ट्रेलिया ३४ रनले विजयी भएको थियो ।

मंगलबार भारतले २ सय ९९ रनको लक्ष्य ४ विकेटको क्षतिमा अन्तिम ओभरको दोस्रो बलमा पूरा गर्यो । भारतको जितमा कप्तान विराट कोहलीले १ सय १२ बलमा ५ चौका र २ छक्का प्रहार गर्दै १ सय ४ रन बनाए । यो कोहलीको ३९ औं वान डे शतक हो  । त्यस्तै पूर्वकप्तान महेन्द्र सिंह धोनीले विजयी इनिङ्स खेले । धोनीले अन्तिम ओभरमा ७ रन चाहिएको अवस्थामा पहिलो बलमा छक्का र दोस्रोमा एक रन लिंदै खेल जिताए ।

लामो समय देखी खराव लयको कारण चर्को आलोचना खेपी रहेका धोनीले आफ्नो आलोचकहरुलाई जवाफ दिएका छन् । धोनीले ५४ बलमा २ छक्का प्रहार गर्दै ५५ रनमा नट आउट रहे । दिनेश काात्तिक २५ रनमा अविजित रहे । भारतका लागि शिखर धवन ३२, रोहित शर्मा ४३ र अम्बाती रायडूले २४ रनको योगदान दिए । अस्ट्रेलियाका लागि मार्कस स्टोइनिस, ग्लेन म्याक्सवेल, झेय रिचर्डसन र जेसन बेहरेनडोर्फले समान एक विकेट लिएपनि जितको लागि पर्याप्त रहेन ।

त्यसअघि एडिलेडमा टस जितेर पहिला ब्याटिङ गरेको अष्ट्रेलियाले शन मार्शको शतकमा निर्धारित ५० ओभरमा ९ विकेटको क्षतिमा २ सय ९८ रन बनाएको थियो । मार्शले १ सय २३ बलमा ११ चौका र ३ छक्का प्रहार गर्दै १ सय ३१ रन बनाएपनि टोलीको हार टार्न सकेनन् । ग्लेन म्याक्सवेलले ३७ बलमा ५ चौका र १ छक्का प्रहार गर्दै ४८ रन बटुले ।

अष्ट्रेलियाका लागि मार्कस स्टोइनिस २९, पिटर हैन्ड्सकोम्ब २०, उस्मान खवाजा २१, एलेक्स क्यारी १८ र नाथन लायनले १२ रनको योगदान दिए । भारतका लागि भुवनेश्वर कुमारले १० ओभरमा ४५ रन खर्चेर ४ विकेट लिए । मोहम्मद शामीले ३ र रविन्द्र जडेजाको नाममा १ विकेट रह्यो ।