सुनसरी (हाम्रो खेलकुद) – सुनसरीको इनरुवामा जारी मनमोहन स्मृति एक दिवसीय राष्ट्रिय क्रिकेट प्रतियोगितामा मिनाश थापाको शतकमा प्रदेश १ ले प्रदेश ४ लाई २ सय २६ रनको फराकिलो अन्तरले पराजित गर्दै सेमिफाइनलमा प्रवेश गरेको छ ।

प्रदेश १ ले २ सय ९३ रनको लक्ष्य पक्ष्याएको प्रदेश चार १५.१ ओभरमा अल आउट हुँदै ६६ रनमा समेटियो । उस्का लागि सुमन घिमिरे २५, अमृत गुरुङ १३ र मुस्कान थापाले ११ रन बनाउन बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् । प्रदेश चारलाई सस्तैमा समेट्न सिद्धान्त लोहनी र मनोज मण्डलले समान ३-३ विकेट लिँदा दिपेश कँडेल र पुष्प थापाको नाममा समान २-२ विकेट रह्यो ।

त्यसअघि टस जितेर पहिला ब्याटिङ थालेको प्रदेश १ ले मिनाश थापाको शतकमा निर्धारित ५० ओभरमा ९ विकेट गुमाउँदै २ सय ९२ रन बनाएको थियो । प्रदेश १ लाई पराकिलो लक्ष्य तयार पार्न मिनाश थापाले १ सय १० बलमा १६ चौका र २ छक्का प्रहार गर्दै १ सय ८ रन बनाए । ओपनर निरज मुखिया र मिनाश थापाले पहिलो विकेटका लागि १ सय ५६ रनको शतकीय साझेदारी गर्दै प्रदेश १ लाई विशाल योगफल तर्फ डोर्याएका थिए । मुखियाले ४१ र मुकुन्द यादव ३६ रन जोड्दा फिर्दोस अन्सारी १७ रनमा नट आउट रहे ।

प्रदेश चारका लागि किशोर महतोले ३ र अमृत गुरुङ,बिपिन खत्री र सन्तोष न्यौपानेले समान २–२ विकेट लिए । यो जितसँगै प्रदेश १ नेट रनरेटका आधारमा एपीएफ र प्रदेश चारलाईपछि पार्दै सेमिफाइनल प्रवेश गरेको छ । अब सेमिफाइनलमा प्रदेश एकले विभागीय टिम नेपाल आर्मीको सामना गर्नेछ । यसअघि नेपाल पुलिस पनि सेमिफाइनल प्रवेश गरिसकेको छ । अन्य एक टोलीको भने टुङ्गो लाग्न बाँकी छ ।