एजेन्सी – नेपाली महिला राष्ट्रिय क्रिकेट टोलीले थाईल्यान्डमा जारी महिला टी–२० स्मास क्रिकेट प्रतियोगितामा लगातार दोस्रो जित दर्ता गरेको छ । आइतबार तेर्थाई क्रिकेट मैदानमा नेपालले मलेसियालाई ६ विकेटले पराजित गरेको हो ।

मलेसियाले प्रस्तुत गरेको ६२ रनको लक्ष्य नेपालले ४ विकेटको क्षतिमा १७ औं ओभरमा पूरा गर्यो । नेपालका लागि रोमा थापाले सर्वाधिक २० रनको योगदान दिंदै जितसम्म डोर्याइन । उनले २४ बलको सामना गर्दै १ चौका प्रहार गरिन् । त्यसअघि ओपनर सिता रानामगर १५ रनमा रनआउट भएकी थिइन् भने अर्की ओपनर काजल श्रेष्ठले ६ रनमात्र जोडिन ।

इन्दु वर्माले ३ रनको योगदान दिंदा सरिता मगरले खाता नखोल्दै रनआउट भइन् । नेपालका लागि ममता कुमारी चौधरी ९ रनमा नटआउट रहिन । मलेसियाका लागि  इन्तान जफार र ऐना हसिमले १-१ विकेट हात पारे ।

त्यसअघि टस जितेर पहिला ब्याटिङ थालेको मलेसियाले १९.३ ओभरमा अल आउट हुँदै ६१ रनमा समेटियो । मलेसियाका लागि युसिरिना यकोपले ११, सोलो टिजीन यी १२, मेस एलियसा एसमिन र विनिफ्रेड डुराईसिंगमले समान ९-९ रन जोडे । क्रिस्टीना नीना बारेट र इन्टन जाफरले समान ४ रन बटुले ।

नेपालका लागि सरिता मगरले घातक बलिङ गरिन् । सरिताले ३.३ ओभरमा ११ रन खर्चेर ४ विकेट लिइन् । त्यस्तै नेरी थापा,इन्दु बर्मा र कविता कुँवरले समान एक-एक विकेट लिए ।

नेपालले प्रतियोगिताको पहिलो खेलमा शनिबार चीनलाई १० विकेटले पराजित गर्दै शानदार सुरुवात गरेको थियो ।