इनरुवा (हाम्रो खेलकुद) – मेखबहादुर सेनले अन्तिम बलमा चौका प्रहार गरेपछि सुनसरीको इनरुवामा जारी मनमोहन स्मृति एक दिवसीय राष्ट्रिय क्रिकेट प्रतियोगितामा एपीएफमाथि प्रदेश चारले १ विकेटको रोमान्चक जित निकालेको छ ।

प्रदेश ४ लाई जितका लागि अन्तिम ओभरमा ४ रन चाहिएको अवस्थामा कमलसिंह ऐरीले लगातार पाँच बल डट गराएपछि खेल एपीएफको पक्षमा जाने देखिएको थियो । तर अन्तिम बलमा सेनले चौका प्रहार गरेपछि प्रदेश ४ ले रोमान्चक जित हात पारेको हो । प्रदेश चारका लागि ओपनर अनिल गुरुङले ९० बलमा १० चौका प्रहार गर्दै ६४ रन बनाए ।

त्यस्तै विधान श्रेष्ठले ८१ बलमा १० चौका प्रहार गर्दै ६१ रनको योगदान दिए । मन्जिल न्यौपाने ३१ जोड्दा मेख बहादुर सेन ७ र राजु गुरुङ ४ रनमा नट आउट रहे । एपीएफका लागि अनिल कुमार शाहले १० ओभरमा १ मेडन सहित ४३ रन खर्चेर ४ विकेट लिएपनि टोलीको हार टार्न सकेनन् । कमल सिंह ऐरी, यज्ञमान कुमाल, भुवन कार्की र अमरसिंह राउटेलाले समान एक-एक विकेट लिए ।

त्यसअघि टस जितेर पहिला ब्याटिङ थालेको एपीएफले निर्धारित ५० ओभरमा ९ विकेटको गुमाउँदै २ सय १५ रन बनाएको थियो ।अनिल कुमार शाह २६, आशिफ शेख १८, भुवन कार्की ३६, अमर सिंह राउटेला २८, कमल सिंह ऐरीले २७ रन जोड्दा इर्शाद अहमद ३० रनमा नट आउट रहे । प्रदेश चारका लागि अमृत गुरुङ,किशोर महतो र सन्तोष न्यैपानेले समान दुई-दुई विकेट लिए । विपिन खत्री,राजु गुरुङ र विधान श्रेष्ठको नाममा पनि समान १ विकेट रह्यो ।