इनरुवा (हाम्रो खेलकुद) – तीव्र गतिका बलर यज्ञमान कुमाल एक्लैले ७ विकेट लिएपछि इनरुवामा जारी मनमोहन एकदिवसीय राष्ट्रिय क्रिकेट प्रतियोगितामा सशस्त्र प्रहरी बल (एपीएफ) ले प्रदेश १ माथि ९२ रनको जित निकालेको छ ।

एपीएफले प्रस्तुत गरेको १ सय ५५ रनको लक्ष्य पछ्याउने प्रदेश एक १७.५ ओभरमा सबै विकेट गुमाएर ६२ रनमा समेटियो । प्रदेश एकका लागि दिपेश कँडेलले १९ र फिर्दोस अन्सारीले ११ रन जोड्न बाहेक अन्य कुनै पनि ब्याट्सम्याले दोहोरो अंकमा रन जोड्न सकेनन् । प्रदेश एक ले १६ रन अतिरिक्त पाएको थियो । प्रदेश एक का चार ब्याट्सम्यान डक आउट भए । प्रदेश एकलाई सस्तैमा रोक्न एपीएफका यज्ञमान कुमालले मात्र ५.५ ओभरमा १ मेडन सहित १६ रन खर्चेर ७ विकेट लिए । भुवन कार्कीले २ र कमल सिंह ऐरीको नाममा १ विकेट रह्यो ।

त्यसअघि टस जितेर पहिलो ब्याटिङ थालेको एपीएफ ३६ ओभरमा अल आउट हुँदै १ सय ५४ रनमा समेटियो । एपीएफका लागि आशिफ शेख र कमल सिंह ऐरले समान ३३ रन जोडे । त्यस्तै पुरन बिक २८, प्रजवल शाही १४ र अनिल कुमार शाहले १२ रन बनाउन बाहेक अन्य ब्याट्सम्यानले सम्झन योग्य प्रर्दशन गर्न सकेनन् ।

प्रदेश एकका लागि दिपेश कंडेलले १० ओभरमा १ मेडन सहित ३५ रन खर्चेर ४ लिए पनि टोलीको हार टार्न सकेनन् । सिद्धान्त लोहनीले ३,मुकुन्द यादव २ र पुष्प थापाले १ विकेट हात पारे ।