एजेन्सी – श्रीलंकासँगको तीन वान डे श्रृंखला घरेलु टोली न्युजिल्यान्डले क्लिनस्विप गरेको छ । तेस्रो तथा अन्तिम खेलमा मंगलबार श्रीलंकालाई १ सय १५ रनको फराकिलो अन्तरले हराउँदै ३–० श्रृंखला जितेको हो ।

यसअघि न्युजिल्यान्ड पहिलो खेलमा ४५ र दोस्रोमा २१ रनले विजयी भएको थियो । ३ सय ६५ रनको विशाल लक्ष्य पक्ष्याएको श्रीलंका ४२ औं ओभरमा सबै विकेट गुमाएर २ सय ४९ रनमा समेटियो । श्रीलंकाका थिसेरा परेराले ६३ बलमा ७ चौका र ३ छक्का गर्दै ८० रन बनाएपनि टोलीको हार टार्न सकेनन् ।

श्रीलंकाका अन्य धनन्जय डी शिल्भा ३६, दनुष्का गुणतिलक ३१,निरोशन डिक्वेला ४६ र कुशल परेराले ४३ रन जोड्न बाहेक अन्य कुनै पनि ब्याट्सम्यानले सम्झन योग्य प्रर्दशन गर्न सकेनन् । श्रीलंकाका ४ ब्याट्सम्यान डक आउट हुन पुगे । अन्तिम चार विकेट गुमाउदा श्रीलंकाले कुनै रन जोड्न सकेन । न्युजिल्यान्डका लोकी फर्गुसनले ८ ओभरमा ४० रन खर्चेर ४ विकेट लिदा इश सोधी ३ र जेम्स निशम र टिम साउदीको नाममा समान १ विकेट रह्यो ।

त्यस अघि घरेलु मैदान निलसनमा टस हारेर पहिला ब्याटिङ थालेको न्युजिल्यान्डले निर्धारित ५० ओभरमा रोश टेलर र हेनरी निकोलसको सानदार शतकमा मात्र ४ विकेटको क्षतिमा ३ सय ६४ रन जोडेको थियो । हेनरी निकोलसले मात्र ८० बलमा १२ चौका र ३ छक्का प्रहार गर्दै १ सय २४ रनमा नट आउट रहे । रोश टेलरले १ सय ३१ बलमा ९ चौका र ४ छक्का प्रहार गर्दै १ सय ३७ रनको योगदान दिए ।

त्यस्तै ओपनर कोलिन मुनरोले २१ र कप्तान केन विलियम्सनले ५५ रन बटुले । श्रीलंकाका लागि कप्तान लाथिस मलिङ्गाले ३ विकेट लिए । अव श्रीलंका र न्युजिल्यान्डबीचको एक मात्र टी–२० खेल आगमी ११ जनवरीमा हुने छ।