एजेन्सी – चेतेश्वर पुजाराको शतक र अन्य ब्याट्सम्यानको औसत प्रर्दशनमा अष्ट्रेलियाविरुद्धको तेस्रो टेस्टको दोस्रो दिनको खेल सकिँदा भारत बलियो अवस्थामा रहेको छ ।

दोस्रो दिन अन्तिम ६ ओभर ब्याटिङ गरेको अष्ट्रेलियाले विकेट नगुमाएर ८ रन जोडेको छ । अष्ट्रेलिया पहिलो इनिङ्समा अझैँ ४ सय ३५ रनलेपछि छ । अष्ट्रेलियाकालागि ओपनर आरोन फिन्च ३ र मार्कस हृयारिस ५ रनमा नट आउट छन् ।

त्यस अघि २ सय १५ रन बनाउन दुई विकेट गुमाएको अवस्थाबाट दोस्रो दिन थालेको भारतले विहीबार १६९.४ ओभरमा ७ विकेटको क्षतिमा ४ सय ४३ रनमा इनिङ्स समाप्तीको घोषणा गर्यो । भारतलाई विशाल योगफल बनाउन चेतेश्वर पुजाराले शतक, मंयाक अग्रवाल,विराट कोहली र रोहित शर्माले अर्ध शतक प्रहार गरे ।

करियरको १७ औँ शतक पुरा गरेका पुजाराले ३ सय १९ बलमा १० चौका प्रहार गर्दै १०६ रन बटुले । पुजारालाई १२५.४ ओभरमा प्याट कमिन्सले बोल्ड गरेका थिए । विराट कोहलीले २०४ बलमा ९ चौका प्रहार गर्दै ८२ रन बनाए । रोहित शर्मा ६३ रनमा नट रहँदा ऋषव पन्त ३९,अजिंक्या रहाणे ३४ र रविन्द्र जडेजा ४ रनमा आउट हुन पुगे ।

पहिलो दिन ओपनर मंयाक अग्रवालले ७६ र हनुमावा विराहीले ८ रन बनाएका थिए । अष्ट्रेलियाका लागि प्याट कमिन्सले ३,मिचेल स्टार्क २,लाथन लायन र जोश हेजलवुडले समान एक विकेट लिए । चार टेस्टको श्रृंखलामा पहिलो खेलमा भारत ३१ रनले विजयी हुँदा दोस्रो खेलमा १ सय ४६ रनले पराजित भएको थियो ।