काठमाडौं (हाम्रो खेलकुद) – रुस्लान धनगढी प्रिमियर लिगको तेस्रो संस्करणको लागि खेलाडी दर्ता प्रक्रिया खुला भएको छ । तेस्रो संस्करण यहि माघ १९ गतेदेखि फाल्गुन ४ गतेसम्म धनगढीको फाप्ला अन्तराष्ट्रिय क्रिकेट मैदानमा हुँदैछ ।

आयोजक धनगढी क्रिकेट एकेडेमीले विगतका वर्षहरुझै यस वर्ष पनि अक्सनमार्फत नै खेलाडीहरुको छनोट गर्दैछ । यसवर्ष विगतझैं खेलाडीलाई विभिन्न वर्गमा विभाजन गरिने छैन । खेलाडी स्वयंले दर्ता फारम भर्दा न्यूनतम ३० हजार देखि अधिकतम २ लाख ५० हजारसम्म बेस प्राईस निर्धारण गर्न सक्नेछन् ।

खेलाडी दर्ता फर्म भर्ने मिति पुस ४ गतेदेखि पुस १० गते सम्म एक साताका लागि खोलिएको छ । खेलाडी अक्सन पौष १२ गते हुनेछ । जोकोही खेलाडीले पनि अक्सनमा नाम दर्ता गर्न सक्नेछन् ।

फर्म भर्नका लागि डीपीएलको वेबसाइटमा फर्म भर्न सकिने छ । फर्म शुल्क डीपीएलको वेबसाईटमा (www.dplofficial.com) ई-सेवाको मार्फत भुक्तानी गर्नुपर्ने छ । फर्म शुल्क १ हजार रुपैयाँ तोकिएको छ ।

आयोजकले ट्यालेन्ट हन्टका लागि भने धनगढी क्रिकेट एकेडेमीको अफिसमा  फर्म भर्नुपर्ने प्रावधान राखेको छ । ट्यालेन्ट हन्टको छनोट पौष ९ गते सोमबार धनगढी क्रिकेट एकेडेमीमा हुनेछ ।

विगतको सिजनझैं प्रतियोगितामा ६ टिमको सहभागिता रहने छ । पछिल्लो दुवै सिजनको उपाधि टिम चौराहा धनगढीले जितेको थियो ।