काठमाडौं – भैरहवा ग्ल्याडीयटर्सलाई ६ विकेटले पराजित गर्दै ललितपुर प्याट्रीयट्स एभरेष्ट प्रिमियर लिग (ईपीएल)को शिर्ष स्थानमा कायमै रहेको छ ।

भैरहवाले प्रस्तुत गरेको ९३ रनको लक्ष्य पछ्याएको ललितपुरले १४.२ ओभरमा ४ विकेटको क्षतिमा ९६ रन बनाउर्दै सहजै पुरा गर्दै पहिलो क्वालिफायरमा आफ्नो स्थान पक्का गरेको छ । ललितपुरले पहिलो क्वालिफायरमा कोसँग खेल्ने भन्ने सोमबार हुने काठमाडौं किंग्स इलाभेन र विराटनगर वारीयर्सको नतिजाले निर्धारण गर्ने छ ।

ललितपुरको जितमा जय किशन कोल्सावालाले २७ बलमा १ चौका प्रहार गर्दै २२ रनमा नट आउट रहे । चौका हान्दै खेल जिताएका सन्दीप जोराले १० बलमा २ चौका र १ छक्का प्रहार गर्दै १८ रनमा नट आउट रहे । त्यस्तै पवन सर्राफले ३६ बलमा २ चौका र १ छक्का प्रहार गर्दै २५ रन बनाउदा गौरव तोमर ९, ज्ञानेन्द्र मल्ल ४ रनमा आउट भए । भैरहवाका लागि रायन टेन डेस्काटेले २, शरद भेषवाकर र मोहम्मद नविदले समान एक विकेट लिए पनि जितको लागि प्रयाप्त रहेन ।

त्यस अघि टियू क्रिकेट मैदानमा टस हारेर पहिला ब्याटिङ थालेको भैरहवाले १९ ओभरमा सबै विकेट गुमाएर ९२ रन मात्र बनाउन सक्यो । भैरहवाका लागि रविइन्दर सिंह र रायन टेन डेस्काटे बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् । दोस्रो ओभरको चौथो बलमा सन्नी पटेलले ओपनर मोहम्मद नविदलाई विकेटकीपर जय किशनकोल्सावालाको हातबाट क्याच गराउदैं २ रनमा पेभिलिएन फर्काए । चौथो ओभरको तेस्रो बलमा प्रदीप एरीलाई सन्नी पटेलले २ रनमा बोल्ड आउट गर्दिए ।

त्यस्तै सातौ ओभरको दोस्रो बलमा योगेन्द्रसिंह कार्कीले भारतीय ब्याट्सम्यान रविइन्दर सिंहलाई २५ रनमा बोल्ड आउट गरेपछि भैरहवा संकटमा परेको थियो । सिंहले १५ बलमा ३ चौका र २ छक्का प्रहार गरे । त्यस्तै आठौं ओभरको पहिलो बलमा सन्नी पटेलले कप्तान शरद भेषवाकरलाई १ रनमा एलपी डब्लु आउट गरेपछि भैरहवाको ठूलो स्कोरको आसा टाढिएको थियो ।

छैटौं विकेटका लागि रायन टेन डेस्काटे र रोहित कुमार पौडेलले ३४ रनको साझेदारी गर्दै भैरहवालाई सम्मानजनक स्थितीमा पुयाउने खोजेको थिए । तर १५.३ ओभमा योगेन्द्रले सन्दीप जोराको हातबाट डेस्काटेलाई ३७ रनमा आउट गरेपछि भैरहवा सस्तैमा समेटीएको हो । डेस्काटेले ३६ बलमा ३ चौका र १ छक्का प्रहार गरे । भैरहवाको विकेट पतन निरन्तर जारी रह्यो । ललितपुरका बलर हाबी रहि रहे । आरिफ शेख४, रोहित कुमार पौडेल ७, कृष्ण कार्की ४, कुशल मल्ल ३ भुवन कार्की र अभिनाश बोहरा डक आउट हुन पुगे ।

ललितपुरको जितमा भारतीय स्पिनर सन्नी पटेलले घातक बलिङ गरे । सन्नीले ४ ओभरमा मात्र १२ रन खर्चेर ५ विकेट लिएपछि भैरहवा सस्तैमा खुम्चिएको हो । त्यस्तै योगेन्द्रसिंह कार्की र राशिद खानले समान २ विकेट लिदा ललित नारायण राजवंशीलेको नाममा पनि एक विकेट रह्यो ।

ललितपुर आजको जितसँगै ५ खेलमा ४ मा जित र १ मा हारका साथ शिर्ष स्थानमा यथावत रहेको छ । भैरहवा ५ खेलमा ३ मा जित र २ मा हारका साथ दोस्रो स्थानमा छ । त्यस्तै काठमाडौं ४ खेलमा १ मा हार र ३ मा जितका साथ तेस्रो स्थानमा रहेको छ । विराटनगर चार खेलमा समान २ मा जित र हारका साथ चौथो स्थानमा रहेको छ । पाँचौ स्थानमा रहेको चितवनले ५ खेलमा ३ मा हार र २ मा जित निकालेको छ । यी दुई मध्य एक टोलीले प्ले अफमा पुग्ने छन् । पोखरा राइनोज ५ खेलमा जित विहीन हुदैं पुछारमा रहेर बाहिरी सकेको छ ।