एजेन्सी – भारतसँगको दोस्रो टेस्टमा घरेलु टोली अष्ट्रेलियाले पहिलो दिनको खेल सकिदा मध्यम सुरुवात गरेको छ । पर्थमा टस जितेर शुक्रबार पहिला ब्याटिङ थालेको अष्ट्रेलिया पहिलो दिनको खेल सकिदा ९० ओभरमा २ सय ७७ रन बनाउन ६ विकेट गुमाएको छ ।

मार्कस ह्यारिस, अष्ट्रेलिया

अष्ट्रेलियाका लागि प्याट कमिन्स ११ र कप्तान टिम पेन १६ रनमा नट आउट रहेका छन् । घरेलु टोली अष्ट्रेलियालाई ओपनर आरोन फिन्च र मार्कुस हृयारिसले १ सय १२ रनको शतकीय साझेदारी गर्दै राम्रो सुरुवात दिलाएका थिए । पहिलो विकेटको रुपमा आउट भएका फिन्चले १ सय ५ बलमा ६ चौका प्रहार गर्दै ५० रन बनाए ।

कुनै समय ११२-१ (३५.२ ओभर) को स्थितिमा रहेको अष्ट्रेलिया ५४.१ ओभरमा १४८-४ को अवस्थामा पुगेको थियो । हृयारिसले १ सय ४१ बलमा १० चौका प्रहार गर्दै ७० रनमा आउट भए । पाँचौ विकेटका लागि ट्रभिस हेड र शन मार्शले ८४ रनको महत्वपूर्ण साझेदारी गर्दै ७८ ओभरमा २३२ रनको बलियो अवस्थामा पुर्याए ।

शन मार्शले ९८ बलमा ६ चौका प्रहार गर्दै ४५ रन बनाए ।त्यस्तै पिटर हृयान्डस्कोम्ब ७ र उस्मान खवाजा ५ रन बनाए । हेडले ८० बलमा ६ चौका प्रहार गर्दै ५८ रन बनाइ आउट भए । भारतका लागि हनुमा विहारीले र ईशान्त शमाले समान दुइ विकेट लिदा, जसप्रित बुमराह र उमेश यादवले पनि समान एक विकेट लिए ।

४ टेस्टको श्रृंखलामा पहिलो टेस्ट ३१ रनले पराजित भएको घरेलु टोली अष्ट्रेलियालाई दोस्रो टेस्ट जित्नै पर्ने दबाब रहेको छ ।