काठमाडौं (हाम्रो खेलकुद) – तेस्रो संस्करणको टिभीएस एभरेष्ट प्रिमियर लिग (ईपीएल) को चौथो दिन पहिलो खेलमा पोखरा राइनोजले विराटनगर वारियर्सलाई ८५ रनको सामान्य लक्ष्य दिएको छ ।

विराटनगर वारीयर्स

कीर्तिपुरस्थित टीयू क्रिकेट मैदानमा टस हारेर पहिला ब्याटिङ थालेको पोखराले २० ओभरमा ७ विकेटको क्षतिमा ८४ रन बनायो । पोखराको सुरुवात देखीनै खराब प्रर्दशन गर्यो । पोखराले ३.५ ओभरमा १९ रन बनाउन ४ विकेट गुमाएको थियो । पहिलो विकेटका रुपमा कप्तान काइल कोट्जरलाई ४ रनमा रोलफ भान डर मर्वले पहिलो ओभरको अन्तिम बलमा विकेटकीपर आशिफ शेखको हातबाट क्याच आउट गराउदै पेभिलिएन फर्काए ।

पल भान मिकरेनले दोस्रो ओभरको दोस्रो बलमा सुबेन्दु पाण्डेलाई डक आउट र तेस्रो ओभरको तेस्रो बलमा मर्वले रिचर्ड लेभीलाई ४ रनमा पेभिलिएनको बाटो देखाएपछि पोखरा सूरुवातमै दबाबमा परेको थियो । त्यस्तै चौथो ओभरको पाँचौ बलमा बसन्त रेग्मीले विनोद भण्डारीलाई १ र पल कोग्लिनलाई ११ ओभरको तेस्रो बलमा मिकरेनलेले २० रनमा आउट गरेपछि पोखरा ४९ रन जोड्न ५ विकेट गुमाएर कमजोर अवस्थामा पुगेको थियो ।

राजेश पुलामी मगर

पोखराको विकेट पतन निरन्तर जारी रह्यो । निरन्तर विकेटको सिलिसिलालाई कुनै पनि ब्याट्सम्यानले रोक्न सकेनन् । छैटौं विकेटका लागि शुसन भारी र राजेश पुलामी मगरले २१ रनको साझेदारी गर्दै पोखराको इनिङ उकास्ने प्रयास गरेका थिए । तर स्मित पटेलले १५.५ ओभरमा राजेशलाई १७ रनमा करण केसीको हातबाट क्याच गराउदै पेभिलिएन फर्कापछि पोखरा पूर्णरुपमा धरासयी बनेको थियो । सातौं विकेटका रुपमा भारी ८ रनमा आउट भए । शक्ति गौचन ३ र बिक्रम शोब ५ रनमा नट आउट रहे ।

विराटनगरका लागि पल भान मिकरेनले ४ ओभरमा १७ रन खर्चेर ३ वकेट लिए । रोलफ भान डर मर्वले ४ ओभरमा २० रन खर्चेर २ विकेट लिए । सन्नी पटेलले कसिलो बलिङ गरे । पटेलले ४ ओभरमा १० रन खर्चेर १ विकेट लिए । बसन्त रेग्मीको नाममा पनि १ विकेट रह्यो ।