काठमाडौं (हाम्रो खेलकुद) – ओपनर रिचर्ड लेभीले उत्कृष्ट ब्याटिङ गरेपछि टिभीएस एभरेष्ट प्रिमियर लिग (ईपीएल)को तेस्रो खेलमा पोखरा राइनोजले भैरहवा ग्ल्याडीयटर्सलाई २ सय १६ रनको कीर्तिमानी विशाल लक्ष्य दिएको छ ।

रिचार्ड लेभी (दायाँ) र काइल कोट्जर

ईपीएलको तेस्रो संस्करणसम्म आईपुग्दा २ सय रन पहिलो पटक क्रस भएको हो । टस जितेर पहिला ब्याटिंग गरेको पोखराले २० ओभरमा ५ विकेटको क्षतिमा २ सय १५ रन बनायो । ओपनर रिचर्ड लेभी र काइल कोट्जरले पहिलो विकेटको लागी उत्कृष्ट १ सय ४ रनको शतकीय साझेदारी गरेपछि विशाल योगफल बनाएको हो ।

दक्षिण अफ्रिकाका ओपनर समेत रहेका लेभीले आक्रमक ब्याटिङ गरे । २३ बलमा अर्धशतक पुरा गरेका लेभीले ८. २ ओभरमा कृष्ण कार्कीको ओभरमा रायन टेनको हातबाट क्याच आउट हुनु अघि ७९ रन बनाए । उनले ३६ बलमा समान ७ चौका र छक्का गरे । त्यस्तै पोखराका सुनिल धमला र कोट्जरले दोस्रो विकेटका लागि ७१ रनको साझेदारी गरेपछि ईपीएलमा पहिलो पटक २ सय रन कटेको हो ।

रिचार्ड लेभी

धमला २२ बलमा १ चौका र २ छक्का प्रहार गर्दै ३८ रनमा पेभिलिएन फर्किए । धमलालाई पुनित महेराले १५. ४ बलमा रायन टेनको हातबाट क्याच आउट गराएका हुन् । त्यस्तै कोट्जरलाई अभिनास बोहराले १६.१ ओभरमा कृष्ण कार्कीको हातबाट क्याच गराउदै ४७ रनमा आउट गरे । उनले ३७ बलमा ४ चौका र २ छक्का प्रहार गरे ।

पोखराका अन्य पल कोग्लिन २० , विनोद भण्डारी ६,राजेश पुलामी मगर ३ र सौरभ खनालले ७ रन बनाए । भैरहवाका लागि कृष्ण कार्की,पुनित, अभिनास र रायनले समान एक विकेट लिन बाहेक अन्य कुनैपनि बलरले विकेट लिन सकेनन् ।

सुनील धमला