काठमाडौं (हाम्रो खेलकुद)– स्वतन्त्र समितिले तय गरेको समय सिमा भित्र काम कारवाही अघि बढेको खण्डमा अबको ५ महिना भित्र नेपाल क्रिकेट संघ (क्यान) को निर्वाचत हुने विश्वास लिएको छ ।

क्यानमाथिको निलम्बन फुकुवाको वातावरण निर्माण र क्यानको निर्वाचित प्रक्रिया अघि बढाउन गठिन स्वतन्त्र समितको शनिबार राजधानीमा बैठक बसेको थियो । बैठकले विवादित विभिन्न विषय समाधानका लागि समय सिमा तोकेको समितिका सदस्य एलबी क्षेत्रीले बताएका छन् ।

‘क्यानका स्टेक होल्डरले पुरा गर्नुपर्ने कामका लागि समय सिमा तोकिएको छ,’नेपाली क्रिकेट टोलीका पूर्व कप्तान क्षेत्रीले भने,’बाँकी रहेका सबै काम पुरा गर्ने हो भने अब अप्रिल सम्ममा क्यानको निर्वाचत हुनेछ । तर, त्यसका लागि सबै पक्ष इमान्दार हुन पर्दछ । ‘

आइसीसीका उपाध्यक्ष इमराख ख्वाजाको समन्वयमा शनिबार भएको बैठकमा ५ सदस्यीय समितिका आइसीसी प्रतिनिधि नितिशा कोठारी बाहेक ४ जनाको उस्थिति थियो । समितिका सदस्य आइसीसीका मोहम्मद अली, अमर शेख, क्षेत्री र अर्को सदस्य ठाकुर प्रताप थापा बैठकमा सहभागी थिए ।

कोठारी उपस्थित नभएका कारण समितिले निर्णय भने सार्वजनिक गरेको छैन । केहि औपचारिकता पुरा गरेपनि निर्णय सार्वजनिक हुने क्षेत्रीले बताए । क्यानमाथिको निलम्बन अबको तीन महिना भित्र फुकुवा हुने स्वतन्त्र कमिटिले विश्वास लिएको छ ।

बैठकमा भएको सबै छलफलका विषयमा स्वतन्त्र समितिले प्रष्ट नगरेपनि क्यानका जिल्ला संघमा विवाद देखिए त्यसको समाधान र निर्वाचित समितिले सर्वोच्च अदालतमा दायर गरेको मुद्दा फिर्ता लिने निर्णय गर्नुलाई बैठकले सकारात्मक भएको बताएको छ ।

क्यानको साधारण सभाले वैशाखमा आइसीसीले पठाएको विधानलाई हुबहु पास गरेपछि पाँच सदस्यीय स्वतन्त्र समिति गठन गरि प्रक्रिया सुरु भएको थियो । पाकिस्तानमा गत महिना सम्पन्न एसीयाली क्रिकेट काउन्सील एसीसीको बैठकले पनि क्यानमाथिको विवाद समाधानका लागि आइसीसीसँग आग्रह गरेको थियो ।

आन्तरिक विवाद समाधान भए, आईसीसीको आगामी बोर्ड बैठकमा निलम्बन फुकुवाका लागि प्रस्ताव पेश गर्ने तयारीमा स्वतन्त्र समिति रहेको सदस्य थापाले बताएका छन् ।