एजेन्सी- अस्ट्रेलियासँगको पहिलो टेस्ट खेलको पहिलो दिन  भारतले पहिलो इनिङसमा संघर्ष गर्दै खेलिरहेको छ ।

बिहीबार एडिलेडमा टस जितेर पहिला ब्याटिङ गरेको भारतले पहिलो दिनको खेल सकिँदा ८७.५ ओभरमा ९ विकेटको क्षतिमा २ सय ५० रन जोडेको छ । खराब सुरुवात गरेको भारतलाई मध्यम स्कोर सम्म पुर्याउन चेतेश्वर पुजाराले उत्कृष्ट शतक प्रहार गरे । पहिलो दिनको अन्तिम बलमा रन आउट भएका पुजाराले २ सय ४६ बलमा ७ चौका र २ छक्का प्रहार गर्दै १ सय २३ रन बनाए । पुजारा ८७.५ बलमा जोश हजलेवुडको बलमा प्याट कमिन्सले रन आउट पारेका थिए ।

भारतका लागि रोहित शर्माले ३७, ऋषभ पन्त र रविचन्द्र आश्विनले समान २५ रन बनाउन बाहेक अन्य कुनै पनि ब्याट्सम्यानले राम्रो प्रर्दशन गर्न सकेनन् । दोस्रो ओभरको अन्तिम बलमा हजलेवुडले आरोन फिन्चको हातबाट क्याच गराउदै के एल राहुललाई ३ रनमा आउट गरेका थिए । दोस्रो विकेटको रुपमा मुरली विजयलाई मिचेल स्टार्कले कप्तान टिम पेनको हातबाट क्याच आउट गराउदै ११ मा पेभिलिएन फर्काए । त्यस्तै तेस्रो विकेटका रुपमा कप्तान विराट कोहलीलाई कमिन्सले उस्मान खवजाको हातबाट क्याच आउट गराउदै ३ रनमा पेभिलिएनको बाटो देखाएपछि भारत कुनै समय १०.३ ओभरमा १९–३ को कमजोर अवस्थमा पुगेको थियो ।

कुनै सयम भारत ४९.१ ओभरमा १२७ – ६ को अवस्थामा पुगि सकेको थियो । सातौँ विकेटका लागि पुजारा र आश्विनले ६२ रनको महत्वपूर्ण साझेदारी गर्दै भारतको संकट टारे । भारतका अन्य अजिंका रहाणेले १३ र इसान्त शर्माले ४ रन जोडे । त्यस्तै मोहम्मद शामी ६ रनमा क्रिजमा रहदा उनलाई जसप्रित बुमराहले दोस्रो दिन साथ दिने छन् । अस्ट्रेलियाका लागि मिचेल स्टार्क,कमिन्स,हजलेवुड र नाथन लियोनले समान दुई विकेट हात पारे ।