एजेन्सी – अष्ट्रेलियाका १८ वर्षे ओलिवर डेभिसले घरेलु लिग यू–१९ च्याम्पियनशिपमा ६ बलमा ६ छक्का सहित दोहोरो शतक बनाएका छन् ।

न्यू साउथ वेल्स (एनएसडब्लू) मेट्रोका कप्तान समेत रहेका डेभिसले सोमबार एडिलेडमा भएको खेलमा नर्थन टेरीटोरीविरुद्ध अफ स्पिनर ज्याक जेम्सलाई ४० औँ ओभरमा ६ बलमा ६ छक्का प्रहार गरेका हुन् । उनले कुल १ सय १५ बलमा १७ छक्का र १४ चौका प्रहार गर्दै २ सय ७ रनको कीर्तिमानी दोहोरो शतक पुरा गरे ।

अन्तर्राष्ट्रिय क्रिकेटमा भारतीय ओपनर रोहित शर्मा, दक्षिण अफ्रिकाका पुर्व कप्तान एवी डेभिलियर्स र क्रिस गेलले एकै इनिङसमा १६ छक्का प्रहार गरेको कीर्तिमान छ । यस अघि एकै खेलमा यी तीन ब्याट्सम्यानले १६ छक्का प्रहार गरेको रेकर्ड थियो । ७४ बलमा शतक प्रहार गरेका उनले ३९ बलमा अर्को सय रन जोड्दै दोहारो शतक कटाएका हुन् ।

डेभिसको दोहोरो शतकसँगै निर्धारित ५० ओभरमा मेट्रोले ४ विकेटको क्षतिमा ४ सय ६ रन बनाएको थियो । उनलाई अर्का ब्याट्सम्यान स्यामुएल फ्यानीङले १ सय ९ बलमा ९९ रन बनाउँदै साथ दिए । आक्रामक ब्याटिङ गरेका डेभिसले बलिङ गर्दै एक विकेट पनि लिए । नर्थन टेरीटोरी अन्तिम ओभरमा २ सय ३८ रनमा अलआउट भएपछि डेभिसको टोलीले १ सय ६८ रनको जित दर्ता गर्यो ।

भिडियो हेर्नुहोस्: