घरेलु मैदानमा नेपाली युवा टोलीले शनिबार साफ यू १९ च्याम्पिसिपको उपाधि जितिरहँदा मलेसियामा भने नेपाली युवा क्रिकेट टोलीले पराजय बेहोरेको छ ।

नेपाली यू १९ क्रिकेट टोली शनिबार बलियो अफगानिस्तानसँग १० विकेटको ठूलो अन्तरले पराजित भएको थियो । पहिलो खेलमा संयुक्त अरब इमिरेट्स (यूएइ) लाई १ सय ४९ रनले हराएको नेपाल दोस्रो खेलमा कमजोर सावित भयो । क्वालालम्पूरस्थित किनरारा एकेडेमी ओभल मैदानमा टस जितेर ब्याटिङमा उत्रेको नेपाली टोली ४७.५ ओभरलमा अलआउट हुँदै १ सय २३ रनमा खुम्चिएको थियो । जवाफमा अफगानिस्तानले निर्धारित ५० मध्ये आधा ओभरमा विना नोक्सानी १ सय २७ रन जोड्दै लगातार दोस्रो खेल जित्यो ।

शुक्रबार युएइसँग दमदार देखिएका नेपाली बलरले अफगानिस्तानविरुद्ध कुनै कमाल देखाउन सकेनन् । सुरुमा नेपालले ब्याटिङमा कमजोर देखिएपछि बलरले मात्र नतिजा आफ्नो पक्षमा पार्ने सम्भावना कम थियो । नेपालका लागि ओपनर सुनिल धमलाले टोलीका लागि सर्वाधिक ४६ रन जोडेका थिए । उनले ८६ बल खेल्दै ५ चौका प्रहार गरे । योगेन्द्रसिंह कार्की र प्रेम तामाडले समान २० तथा दीपेन्द्र सिंह ऐरीले १० रन बनाएका थिए । अन्य कुनै पनि खेलाडीले दोहोरो अंकमा रन बनाउन सकेनन् । दुई खेलको समाप्तीपछि नेपाल २ अंकका साथ तेस्रो स्थानमा छ । समान ४ अंक जोडेका अफगानिस्तान शीर्ष र मलेसिया दोस्रो स्थानमा छ । नेपालले सोमबार आयोजक मलेसियासँग प्रतिस्पर्धा गर्नेछ ।