एजेन्सी – युएईमा जारी टी-१० लिगमा आइतबार जारी खेलमा केराला नाइट्स र राजपुत्सबीच खेल भइरहेको छ । केरालाका लागि नेपाली युवा बलर सन्दीप लामिछानेले मिश्रित प्रदर्शन गरेका छन् ।

वर्षाले खेल रोकिनुअघि पहिलो ब्याटिङ गरेको राजपुत्सले ९ ओभरमा ५ विकेट गुमाउँदै ९४ रन जोडेको छ । लौरी एभान्सले आक्रामक ब्याटिङ गर्दै १९ बलमा नटआउट ३८ रन जोडेपछि राजपुत्सले राम्रो स्कोर खडा गर्यो  । राजपुत्सका लागि कप्तान ब्रेन्डन मक्कुलमले १२ बलमा २१ रन जोडे ।

तेस्रो नम्बरमा आएका रुसोले ११ बलमा २१ रनको योगदान दिए । ओपनर मोहमद सहजाद र क्रेग ब्रेथवेटले १-१ रन मात्र जोडे । बेन डंक ८ रनमा आउट भए । केरालाका लागि सन्दीप लामिछाने र फाबियान एलेनले २-२ विकेट लिए । मोहमद नविदले पनि १ विकेट हात पारे ।

टस जितेर फिल्डीङ रोजेको केरालाका लागि सन्दीपले पहिलो ओभर नै बलिङ गर्ने जिम्मेवारी पाएका थिए । उनले राजपुत्सका आक्रामक ओपनर ब्रेन्डन मक्कुलम र मोहमद सहजादविरुद्ध पहिलो ओभर फ्याँकेका थिए । पहिलो ओभरमा उनले विष्फोटक ब्याट्सम्यान मोहमद सहजादको विकेट हात पारेका थिए ।

पहिलो बलमा सहजादले १ रन लिए भने त्यसपछि लगातार दुई बल मक्कुलमले डट बल खाए । त्यसपछि चौथो बलमा मक्कुलम इनसाइड एज लाग्दै एक रन लिन सफल रहेका थिए । चौथो बलमा सहजाद लामो सट प्रहार गर्ने धुनमा लङ अफमा वायन पारनेलको हातबाट समातिए । त्यसपछि क्रिजमा आएका राइली रुसोले पहिलो बलमा नै आक्रामक सट खेल्दा एज लाग्दै चौका भएको थियो । सन्दीपले पहिलो ओभरमा ६ रन खर्चेर १ विकेट लिए ।

सन्दीप केरालाको सातौं ओभरमा बलिङमा फर्केका थिए । उनलाई लौरी एभान्सले सुरुवाती दुई बलमा लगातार छक्का प्रहार गरे । तेस्रो बलमा एभान्सले एक रन लिएपछि चौथो बलमा सन्दीपले क्रेग ब्रेथवेटलाई आउट गरे । ब्रेथवेट लङ अनमा काइरान पोलार्डको हातबाट समातिए । उनले बेन डंकलाई पाँचौ बलमा डट फ्याँके भने अन्तिम बलमा पारनेलले मिस्फिल्ड गरेपछि चौका खाए ।

समग्रमा सन्दीपले २ ओभरमा २३ रन खर्चेर २ विकेट हात पारे । यस प्रदर्शनसँगै सन्दीपको प्रतियोगितामा ३ खेलमा ६ विकेट भएको छ । उनी सर्वाधिक विकेट लिने सुचीको शीर्षस्थानमा प्रवीन ताम्बेसँगै रहेका छन् ।