काठमाडौं (हाम्रो खेलकुद) – दक्षिण अफ्रिकाका ओपनर रिचर्ड लेवी मंसिर २२ देखी सुरु हुने तेस्रो संकरणको एभरेष्ट प्रिमियर लिग (ईपीएल) मा पोखरा राइनोजबाट खेल्ने भएका छन् ।

पोखरा राइनोजले तेस्रो विदेशी खेलाडीको रुपमा रिचर्डलाई भित्र्याएको जनाएको छ । यसअघि पोखराले इङ्ल्यान्डका अलराउण्डर पाउल कोग्लिन र स्कटल्यान्डका कप्तान काइल कोट्जरलाई अनुबन्ध गरिसकेको छ । त्यस्तै पोखराले पहिलो पटक ईपीएलमा विदेशी कोचका रुपमा अस्ट्रेलियन कोच नाथन डोडलाई प्रमुख प्रशिक्षकमा नियुक्त पनि गरिसकेको छ ।

रिचर्ड लेवीले अफ्रिकाबाट १३ टी-२०, १०० प्रथम श्रेणी र १ सय ३० लिष्ट ए खेल खेलेका छन् । त्यस्तै आईपीएलमा मुम्बई इन्डियनबाट खेलेको पनि अनुभव रहेको छ । लेवीले १३ टी-२० खेलमा समान एक शतक र अर्धशतक सहित कुल २ सय ३६ रन बनाएका छन् ।

लेवीले न्युजिल्यान्डविरुद्ध सन् २०१२ मा १ सय १७ रन शानदार पारी खेलेका थिए । उक्त स्कोर त्यस समय अन्तर्राष्ट्रिय टी-२० मा सर्वाधिक स्कोर पनि थियो । उक्त खेलमा लेवी र एबी डे भिलियर्सले तेस्रो विकेटका लागि नटआउट १ सय ३३ रनको साझेदारी गर्दै जित दिलाएका थिए । भिलियर्सले उक्त खेलमा ३६ बलमा नटआउट ३९ रन प्रहार गरेका थिए । लेवीले भने ५१ बलमा ५ चौका र ३ छक्का प्रहार गरेका थिए ।

आक्रमक ब्याट्सम्यान रिचर्डको स्टाइक रेट १४१.३१ रहेको छ । उनले यसक्रममा २० चौका र १५ छक्का प्रहार गरेका छन् । प्रथम श्रेणीमा उनले १० शतक र ३१ अर्धशतकसहित कुल ५५४४ रन बनाएका छन् ।

शक्ति गौचनले नेतृत्वको पोखरा टीममा विनोद भण्डारी, विक्रम सोब, विपिन खत्री, किशोर महतो, राजेश पुलामी मगर, सुनिल धमला, शौरभ खनाल, सुशन भारी र देव शाह रहेका छन् । पछिल्लो संस्करणमा टोलीमा रहेका सन्तोष भट्ट र नुरध्वज सेनको स्थानमा यसपटक नन्दन यादव र सुवेन्दु पाण्डे टोलीमा आएका छन् ।

ईपीलमा बिराटनगर वारियर्स,ललितपुर प्याट्रियट्स,भैरहवा ग्लाडियटर्स, चितवन टाइगर्स,पोखरा राईनोज, र काठमाडौं किंग्स ११ गरि ६ शहरका ६ टिम रहेका छन् । पोखराले पहिलो खेल शरद भेषवाकर कप्तान रहेको भैरहवा ग्लाडियटर्ससँग खेल्दै प्रतियोगितामा सुरुवात गर्ने छ ।