काठमाडौं (हाम्रो खेलकुद) – आयोजक नेक्सस क्रिकेट एकेडेमी र ग्रेटर हिमालय क्रिकेट एकेडेमीले राजधानीमा आजबाट शुरु भएको मिलानो नेक्सस कप यु–१६ क्रिकेट प्रतियोगितामा विजयी शुरुवात गरेको छ ।

काठमाडौको मुलपानी क्रिकेट मैदानमा शुक्रबार भएको खेलमा नेक्ससले स्याङ्जा क्रिकेट क्लबलाई र ग्रेटर हिमालयले नेक्सस ‘बी’ लाई पराजित गर्दै विजयी शुरुवात गरेको हो ।

नेक्ससले स्याङ्जामाथि ८ विकेटको जित निकालेको हो । टस जितेर स्याङजा लाई ब्याटिङ निम्तो दिएको नेक्ससका बलर हरु चम्कदा स्याङजा क्रिकेट एकेडेमीका ब्याट्सम्यान न्युन स्कोरमै समेटिएका थिए । स्याङ्जाले १४ ओभर २ बलमा सबै विकेट गुमााएर ६९ रनमात्रै जोडेको थियो ।

स्याङ्जाका किरण भट्टराईले १३ रन, सुजन गौतम र सरोज अर्यालले समान १० रन बनाउनदा अन्य ब्याट्सम्यानले दोहोरो अंक जोड्न सकेनन् । नेक्ससका आशिष सुनुवार ३ ओभरमा ९ रन खर्चदै ३ विकेट लिए । क्रिस कार्की २ तथा गोबिन्द बिष्ट र बिशाल केसीले समान १ विकेट लिए ।

७० रनको झिनो लक्ष्य नेक्ससले २ विकेट गुमाएर ९ ओभर २ बलमै लक्ष्य भेट्टायो । नेक्ससका बिशाल केसी र विपीन बिक्रम शाहीले समान २२ रन जोडे । स्याङ्जाका स्वप्निल लम्सालले १ विकेट लिए । नेक्ससका आशिष सुनुवार खेलको म्यान अफ दि म्याच घोषित भए ।

शुक्रबारै भएको दोस्रो खेलमा ग्रेटर हिमालयले आयोजक नेक्सस बी लाई १० विकेटले हराएको छ । टस जितेर ब्याटिङमा उत्रेको नेक्सस ‘बी’ ले १६ ओभरमा ४१ रन मात्र बनाएको थियो । उसका लागि मिकेश ओझाले १३ रन बनाउदा अरु कुनैपनि ब्याट्सम्यानले दोहोरो अंकमा रन जोड्न सकेन । ग्रेटर हिमालयका दिपक बोहाराले ३ विकेट लिन सफल भए । अमित अर्यालले २ विकेट लिए ।

४२ रनको बिजयी लक्ष्यका साथ ब्याटिङमा उत्रेको हिमालयनका दिपक बोहोराले ३२ रन बनाउदा ३ ओभरमै खेल समाप्त भएको थियो । हिमालयनका दिपक बोहोरा म्यान अफ दि म्याच घोषित भएका थिए ।
प्रतियोगिताको कागेश्वरी मनोहरा नगरपालिकाका प्रमुख कृष्णहरि थापाले उद्घाटन गरेको थियो ।