काठमाडौं (हाम्रो खेलकुद)- तेस्रो संस्करणको एभरेष्ट प्रिमियर लिग (ईपीएल) मंसिर २२ देखी टियू क्रिकेट मैदानमा सुरु हुँदैछ  । प्रतियोगिता सुरुहुनु अघि हरेक टिमले विदेशी खेलाडी अनुबन्ध गर्ने क्रम जारी रहेको छ ।

यसै क्रममा केहि दिन अघि अस्ट्रेलियन कोच नाथन डोडलाई प्रमुख प्रशिक्षकमा नियुक्त गरेको पोखरा राइनोजले स्कटल्यान्ड क्रिकेट टोलीका कप्तान तथा प्रमुख ब्याटम्यान काइल कोट्जरलाई भित्त्राएको छ । काइल कोट्जर स्कटल्यान्डका कप्तानसँगै भरपर्दा ब्याटम्यान र पार्टटाइम बलिङ गर्ने खेलाडी हुन् । उनले वान डे क्रिकेटमा ५० खेल खेलेका छन् ।

कोट्जरले ५० खेलमा ४ शतक १२ अर्धशतक प्रहार गर्दै कुल १९ सय ६९ रन बनाएका छन् । ४२.८० को औसतमा रन बनाएका उनले ८८. ८१ को स्ट्राइक रेटमा ब्याटिङ घुमाएका छन् । त्यस्तै टी– २० क्रिकेटमा ४५ खेलमा कुल १ हजार ३५ रन बनाएका छन् । १२०.९१ को स्ट्राइकमा ब्याटिङ गरेका उनले २५. २४ को औसतमा रन बनाएका छन् । लिस्ट ‘ए’ मा १ सय ५७ खेल खेलेका उनले कुल ५ हजार २२ रन बनाएका छन् । जस्मा १२ शतक र २९ अर्ध शतक सामेल रहेको छ ।

ईपीएलमा हरेक टीमले तीन विदेशी खेलाडी खेलाउनै पर्ने प्रावधान रहेको छ । त्यसै अनुरुप गत संकरणमा राइनोजले पाकिस्तानका इसरार उल्लाह,आशिफ अली र ताज वालीलाई अनुबन्ध गरेको थियो । आशिफ अली अहिले पाकिस्तान राष्ट्रिय क्रिकेट टोलीका प्रमुख खेलाडी भई सकेका छन् ।

राइनोजले अव अन्य दुई विदेशी खेलाडी घोषणा गर्न बाँकी रहेको छ । शक्ति गौचनले नेतृत्वको पोखरा टीममा विनोद भण्डारी, विक्रम सोब, विपिन खत्री, किशोर महतो, राजेश पुलामी मगर, सुनिल धमला, शौरभ खनाल, सुशन भारी र देव शाह रहेका छन् । पछिल्लो संस्करणमा टोलीमा रहेका सन्तोष भट्ट र नुरध्वज सेनको स्थानमा यसपटक नन्दन यादव र सुवेन्दु पाण्डे टोलीमा आएका छन् ।

ईपीलमा बिराटनगर वारियर्स,ललितपुर प्याट्रियट्स,भैरहवा ग्लाडियटर्स, चितवन टाइगर्स,पोखरा राईनोज, र काठमाडौं किंग्स ११ गरि ६ शहरका ६ टिम रहेका छन् । पोखराले पहिलो खेल शरद भेषवाकर कप्तान रहेको भैरहवा ग्लाडियटर्ससँग खेल्दै प्रतियोगितामा सुरुवात गर्ने छ ।