काठमाडौं (हाम्रो खेलकुद) – एभरेष्ट प्रिमियर लिग (ईपीएल) को तेस्रो संस्करण मंसिर २२ देखी सुरु हुँदैछ ।  उक्त प्रतियोगिताका लागि यूएईका तीव्र गतिका बलर तथा अलराउण्डर मोहम्मद नाविदले भैरहवा ग्लाडिएटर्सबाट खेल्ने भएका छन् ।

शरद भेषवाकरले कप्तानी गरिरहेको भैरहवा गत संस्करणको उपविजेता टोली हो । एक महिनाअघि शरदकै कप्तानीमा नाविद पोखरा पल्टनबाट पीपीएल खेलेका थिए । नाविदले पीपीएलमा पोखरालाई उपाधि जिताउन उत्कृष्ट प्रर्दशन गरे । उनले ५ खेलमा ७ विकेट लिनुको साथै ८३ रन प्रहार गरेका थिए ।

ईपीएलमा हरेक टिमले तिन विदेशी खेलाडी खेलाउन पाउने प्रावधान रहेको छ । गत सिजन भैरहवाको बिदेशी खेलाडीको रुपमा पुनित मिश्रा र प्रथम सालुङ्केलाई खेलाएको थियो । यस वर्ष यी दुई खेलाडी खेल्ने वा नखेल्ने भन्ने घोषणा गरेको छैन । भैरहवा कप्तान शरद भेषावकरसँगै आरिफ शेख, प्रदिप ऐरि, भुवन कार्की, रोहित कुमार पौडेल, कृष्ण कार्की, हरिशंकर शाह जस्ता खेलाडीहरु रहेका छन् ।

भैरहवालेयस वर्ष सागर ढकाललाई टिममा अनुवन्ध गर्दा अभिनाश बोहोरालाई रिलिज गरेको छ । मंसिर २३ मा पोखरा राइनोजसँग खेल्दै भैरहवा ग्याडिएटर्सले ईपीएलमा सुरुवात गर्ने छ ।