अबुधाबी (एजेन्सी) – न्युजिल्यान्डसँगको पहिलो टेस्ट क्रिकेटमा पाकिस्तानले नाटकीय हार बेहोरेको छ । एक समय १३०-४ को स्थितिमा रहेको पाकिस्तानले  अन्तिम २० ओभरमा ४१ रन जोड्दै ६ विकेट गुमाएपछि ४ रनले पराजित हुन पुगेको हो ।

१ सय ७६ रनको सामान्य लक्ष्य पक्ष्याएको पाकिस्तान चौथो दिन १ सय ७१ रनमा समेटियो । पाकिस्तानका लागि दोस्रो इनिङ्समा असाद सफिक ४५ र अजहर अलीले ६५ रन बनाएपनि टोलीलाई जिताउन सकेनन् । इमाम उल हक २७, मोहमम्द हफिजले १० र बाबर आजमले १३ रन जोड्न बाहेक अन्य कुनै पनि ब्याटम्यानले दोहोरो अंकमा रन छुन सकेनन् । पाकिस्तानका पुछारमा ४ ब्याट्सम्यान डक आउट भए ।

न्युजिल्यान्डलाई हारको मुखबाट जोगाउँदै नाटकीय जित दिलाउन अजाज पटेलले उत्कृष्ट बलिङ गरे । पहिलो टेस्ट खेलिरहेका उनले २३.४ ओभरमा ४ मेडन सहित ५९ रन खर्चेर ५ विकेट लिएपछि न्युजिल्यान्डको जित संभव बनेको हो ।

त्यस्तै इश सोधी र नील वाग्नेरले समान दुई विकेट हात पारे । यसअघि पहिलो इनिङ्समा न्युजिल्यान्डले १ सय ५३ रन बनाउँदा पाकिस्तानले २ सय २७ रन बनाउँदै ७४ रनको अग्रता लिएको थियो । दोस्रो इनिङ्समा न्युजिल्यान्डले २ सय ४९ रन बनाएपछि पाकिस्तानले सम्रगमा १ सय ७६ रनको लक्ष्य पाएको थियो ।

तीन टेस्ट श्रृंखलामा न्युजिल्यान्डले १ – ० को अग्रता कायम गरेको छ । दोस्रो टेस्ट २४ नोभेम्बरबाट सुरु हुने छ । टी– २० क्रिकेटमा क्लिन स्विपको सिकार बनेको भ्रमणकारी टोली न्युजिल्यान्डलाई टेस्ट श्रृंखला जित्दै आफ्नो साख जोगाउनै पर्ने दबाव रहेको छ । त्यसअघि टी–२० क्रिकेटमा ३– ० ले जितेको पाकिस्तानले वान डे खेलमा अन्तिम खेल वर्षाले प्रभावित गर्दा १ – १ को बराबरीमा रोकिएको थियो ।