सिड्नी (एजेन्सी) – अस्ट्रेलियन क्रिकेट टोलीका पुर्व कप्तान स्टिभ स्मिथ र उप कप्तान डेविड वार्नरको एक वर्षे अन्तर्राष्ट्रिय प्रतिबन्ध हट्न सक्ने संभावना बढेको छ ।

गत मार्चमा दक्षिण अफ्रिकाविरुद्ध तेस्रो टेस्ट दौरानमा बल टेम्परिङ गरेको भन्दै क्रिकेट अस्ट्रेलिया बोर्डले स्मिथ र वार्नरलाई १ वर्षे साथै तीब्र गतिका बलर क्यामरन ब्यान्क्रफ्टलाई ९ महिना अन्तर्राष्ट्रिय खेल खेल्न प्रतिबन्ध लगाउने निर्णय गरेको थियो ।

ब्यान्क्रफ्टको १ तथा स्मिथ र वार्नरको प्रतिबन्ध हट्न अझै ४ महिना बाँकी रहेको छ । स्मिथ र वार्नर टोलीमा नहुँदा अस्ट्रेलियन क्रिकेट टोलीले ४० वर्ष यताकै खराव प्रर्दशन गरि रहेको छ । प्रतिबन्ध हटाउन चर्को आलोचना खेपि रहेको अस्ट्रेलिया क्रिकेट बोर्डले वार्नर,स्मिथ र बेनक्राफ्टको प्रतिबन्ध बारे पुन विचारको लागि छलफल बैठक बोलाएको छ ।

यसै साता बस्ने बैठकमा स्मिथ,वार्नर र ब्यान्क्राफ्टको प्रतिबन्ध हटाउने की यथावत राख्ने भन्ने अन्तिम निर्णय हुने अस्ट्रेलियन सञ्चार माध्यमहरुले जनाएका छन् । पछिल्लो एक वर्षको अस्ट्रेलियाको अन्तर्राष्ट्रिय प्रर्दशन, खेलाडी र समर्थकले दिई रहेको चर्को दबाव हेर्दा वोर्डले प्रतिबन्ध हटाउन सक्ने अनुमान गरिएको छ । अस्ट्रेलियाले यी दुई खेलाडी नहुँदा सन् २०१८ मा कुनै पनि श्रृंखला जित्न सकेको छैन भने ४० वर्ष यताकै खराव प्रर्दशन गरि रहेको छ ।

के हो बल टेम्परिङ काण्ड ?

बल कोट्याएर स्वरुप विगानुलाई बल टेम्परिङ भनिन्छ । जुन खेल भावना विपरीत मानिन्छ । यसो गर्दा ब्याट्सम्यानलाई खेल्न निकै मुस्किल हुने गर्दछ । अत्याधिक बाउन्स र अनुमान गरिएको भन्दा फरक तबरबाट बल आउने गर्दछ । खराब प्रर्दशन गरेको अष्ट्रेलिया तेस्रो टेस्टमा फराकिलो हार नजिक पुगेको थियो ।

जुन खेलमा स्मिथ र वार्नरले आफ्नो साख जोगाउन बलको स्वरुप विगारेको हुन सक्ने अनुमान गरिएको छ । उक्त खेलमा अष्ट्रेलिया ३ सय २२ रनले पराजित भएको थियो । बल टेम्परिङ काण्ड गरेको पुष्टि भएपछि आइसीसीले तीनै खेलाडीलाई सिमित खेलमा प्रतिबन्ध लगाएको थियो ।

तर अस्टेलिया क्रिकेट बोर्डले भने १ वर्षे अन्तर्राष्ट्रिय प्रतिबन्ध लगाउने निर्णय गरेको थियो । १ वर्षे अन्तर्राष्ट्रिय प्रतिबन्ध लगाउने बोर्डको निर्णय विश्वभरबाट चर्को आलोचना भईरहेको छ ।