काठमाडौं (हाम्रो खेलकुद) – आयोजक पाँचपोखरी क्रिकेट क्लबले क्रिकेट क्लब बाह्रबिसेलाई ५ विकेटले पराजित गर्दै दोस्रो जितबहादुर खड्का स्मृति पाँचपोखरी सुपर ८ क्रिकेट प्रतियोगिताको उपाधि जितेको छ । उपाधिसँगै विजेता टोलीले ५० हजार रुपैयाँ हात पार्यो ।

फाइनल खेलमा टस जितेर ब्याटिङ गरेको बाह्रबिसेले ५ ओभरमा ७ विकेट गुमाउँदै ३६ रन जोडेको थियो । बाह्रबिसेलाई कम योगफलमा समेट्न विजय धितालले २ ओभरमा १० रन खर्चेर ३ विकेट लिए । बाह्रबिसेका राकेश श्रेष्ठले १४ रन जोड्नुबाहेक अन्य ब्याट्सम्यानले दोहोरो अंक जोड्न सकेनन् ।

जवाफमा पाँचपोखरीले २ विकेट गुमाउँदै तेस्रो ओभरमा लक्ष्य प्राप्त गर्यो । राजु धितालले १३ रनको योगदान दिंदा पवन श्रेष्ठले १ ओभरमा २३ रन खर्चेर १ विकेट हात पारे । खेलको म्यान अफ द म्याच पाँचपोखरीका विजय धिताल भए ।

प्रतियोगिताको विजेताले ५० हजार तथा उपविजेताले ३० हजार रुपैयाँ प्राप्त गरे । प्रतियोगिता अवधिभर १ सय ४२ रन जोडेका भोत्लाङ क्रिकेट क्लबका रमेश तामाङ उत्कृष्ट ब्याट्सम्यान तथा १० विकेट लिएका पाँचपोखरीका अजय धिताल उत्कृष्ट बलर भए । म्यान अफ द सिरिज विजय धिताल भए । उनले ९२ रन जोड्दै ९ विकेट हात पारे । व्यक्तिगत विजेता सबैले वाईवाई ग्रेट हिमालय क्रिकेट एकेडेमीमा १ वर्ष निशूल्क प्रशिक्षण पाउने छन् । थाङपाल धाप क्रिकेट क्लबका सार्थक धिताल एमर्जिङ प्लेअर बने ।