एजेन्सी – दोस्रो टेस्ट खेलमा घरेलु टोली श्रीलंकालाई ५७ रनले पराजित गर्दै इङ्ल्यान्डले तीन टेस्ट क्रिकेट श्रृंखला एक खेल अगावै २-० ले जितेको छ ।

पाँचौ दिन ३० मिनेट भित्र श्रीलंकाले ३ विकेट गुमाएपछि १७ वर्षपछि श्रींलकामा इङ्ल्यान्डले सिरीज जितेको हो । श्रीलंकाले १७ वर्षपछि श्रृंखला गुमाएन मात्र टेस्ट क्रिकेट इतिहासमा पहिलो पटक दुर्लभ रेकर्ड समेत बन्यो । श्रीलंका र इङ्ल्यान्डबीच चार पारीमा कुल ४० विकेटको पतन भयो । जस्मा ३८ विकेट स्पिनर बलरहरुको नाममा रह्यो । यो टेस्ट क्रिकेटको इतिहासमा स्पिनरहरुले लिएको सबैभन्दा धेरै विकेट हो । यस अघि भारत र न्युजिल्यान्डबीच सन् १९६९–७० मा स्पिनरहरुले ३७ विकेट लिएका थिए ।

पहिलो इनिङ्समा इङ्ल्यान्डले २ सय ९० रन बनायको थियो । श्रीलंकाले पहिलो इनिङ्समा ३ सय ३६ रन बनाउदै ४६ रनको अग्रता लिएको थियो । दोस्रो इनिङ्समा कप्तान जो रुटको १ सय २४ रनको उत्कृष्ट शतकीय पारीमा इङ्ल्यान्डले ३ सय ४६ रन बनाउन सक्यो ।

सम्रगमा श्रीलंकाले ३ सय १ रनको लक्ष्य पक्ष्याएको थियो तर २ सय ४३ रनमा अल आउट हुन पुग्दै १७ वर्षपछि इङ्ल्यान्डबीरुद्ध श्रृंखला गुमाउन पुगेको हो । पहिलो टेस्ट खेलमा इङ्ल्यान्ड २ सय ११ रनले विजयी भएको थियो । अन्तिम टेस्ट खेल २३ नोभेम्बर देखी सुरु हुने छ ।