काठमाडौँ – तेस्रो संकरणको रुस्लान धनगढी प्रिमियर लिग (डीपीएल) आगमी माघ १९ देखी फगुन ४ सम्म हुने भएको छ । यस पटक डीपीएलका खेल प्रस्तावित फाप्ला अन्तर्राष्ट्रिय क्रिकेट रंगशालामा खेलहरु हुने भएका छन् ।

यसअघि हुँदै आएको संघीय इकाई प्रहरी कार्यलयको मैदानलाई बैकल्पीक मैदानको रुपमा मात्र प्रयोग गरिने आयोजक धनगढी क्रिकेट एकेडेमीले आज काठमाडौँमा पत्रकार सम्मेलन गरेर जानकारी दिएको छ । डीपीएलको मुख्य प्रायोजक रुस्लान रहेको छ । रुस्लानका चीफ फाइनान्स अफिसर सतीस कर्ण र एकेडेमीका अध्यक्ष सुवास शाहीले आज सम्झौता पत्रमा हस्ताक्षर गरेका छन् । सम्झौता अनुसार रुस्लानले डीपीएललाई १ करोड १० लाख रुपैया दिने छ ।

प्रतियोगिताको कुल लगात खर्च ५ करोड रहेको एकेडेमीका अध्यक्ष सुवास शाहीले जानकारी दिए । पत्रकार सम्मेनलमा बोल्दै अध्यक्ष शाहीले अव नेपालले विश्वकप जित्ने सपना देख्नुपर्ने बताए । डीपीएलमा ६ शहरमा ६ टिम रहेका छन् । प्रतियोगिताका लागि सीबाईसी अत्तरिया, बिराटनगर किङ्स, काठमाडौं गोल्डेन्स, रुपन्देही च्यालेन्जर्स, कञ्चनपुर आइकोनिक र टिम चौराहा धनगढी रहेका छन् । प्रतियोगिता टी–२० को आधारमा हुनेछ ।

लिग चरणमा प्रत्येक टिमले अरु टिमसँग एक–एक खेल खेल्ने छन् । शीर्ष चार टोली प्ले–अफमा पुग्नेछन् । त्यसमा पहिलो र दोस्रो हुने टिमको विजेता फाइनल पुग्नेछ । त्यसमा पराजित हुने टोलीले तेस्रो र चौथो हुने टिमसँगको विजेतासँग फाइनल प्रवेशको लागि खेल्नेछ । रुसलान डीपीएलमा कुल १९ खेल हुनेछन् । गत वर्ष विजेताले २५ पाएको थियो । गत बर्ष आयोजक धनगढी टिम चौराहाले काठमाडौँ गोल्डेन्सलाई २१ रनले हराउदै उपाधि जितेको थियो । तेस्रो संकरणको लागि पुरस्कारको घोषणा गरिएको छैन ।

प्रतियोगितामा दर्शकहरुका लागि टिकटदर मुल्य पनि तोकिएको छ । लिग चरणमा रु५०, प्लेअफमा रु.७० र फाइनलमा रु.१०० तिर्नुपर्ने छ । टिकट बिक्रीको २० प्रतिशत रकम फाप्ला अन्तर्राष्ट्रिय निर्माण अभियान (ड्रिम फाप्ला) लाई छुट्याइने बताइएको छ ।