धनगढी (हाम्रो खेलकुद) – धनगढीमा जारी तेस्रो निष्ट लिटल फ्लावर प्रिमियर लिगअन्तर्गत बिहीबार सरस्वती मावि र लिटिल बुद्धले जित हासिल गरेका छन् ।

पहिलो खेलमा सरस्वतीले भक्तपुर निस्टलाई ६ विकेटले पराजित गर्यो । भक्तपुर निस्टले जितको लागि दिएको १ सय ७ रनको समान्य लक्ष्य १६ दशमलव १ ओभरमा ४ विकेट गुमाउँदै पुरा गर्यो । सरस्वतीको जितमा कप्तान आयुब चन्दले अविजित ४१, अरुण महराले २४, हृदय बिठारिले १८ तथा आशिष पनेरुले अविजित १० रनको योगदान दिए ।

त्यसअघि ब्याटिङ गरेको भक्तपुर निस्ट स्कुलले १९ दशमलव ३ ओभरमा सबै विकेट गुमाएर मात्र १ सय ६ रन मात्र बनाउन सकेको थियो । खेलको म्यान अफ द म्याच सरस्वतीको आयुव चन्द भए । प्रतियोगितामा लगातार दोस्रो खेलमा पराजय भएपछि भक्तपुर निस्ट प्रतियोगिताबाट बाहिरिएको छ।

दोस्रो खेलमा लिटल बुद्ध एकेडेमी कञ्चनपुरले एबिसी आवसीय नेपालगन्जलाई ९६ रनको फराकिलो अन्तरले पराजित गरेको छ। लिटल बुद्धका कप्तान तथा नेपाली अन्डर–१९ टोलिका सदस्य सन्दिप जोराले उत्कृष्ट प्रदर्शन गरे । लिटल बुद्धले जितको लागि दिएको २०२ रनको विशाल लक्ष्य पछ्याउने क्रममा एबिसी १४ दशमलव ४ ओभरमा मात्र १ सय ५ रनमै समेटियो । एबिसीलाई सस्तैमा समेट्ने क्रममा बलिङतर्फ लिटल बुद्धका हेमन्त कार्किले ४ , रोचक ऐरले २, पारस क्षेत्री र कप्तान सन्दीप जोराले समान १-१ विकेट लिए ।

टस जितेर पहिला ब्याटिङ गरेको लिटल बुद्धले सन्दिप जोरा र सुशील खड्काको अर्धशतकिय पारीको मदतले २० ओभरमा ३ विकेट गुमाउँदै २ सय १ रनको विशाल योगफल तयार पारेको थियो । कप्तान जोराले नटआउट ८३, खड्काले ४४ बलमा ५४ र कमल सिंह ऐरिले अविजित १६ बलमा ३२ रन बनाए । लिटल बुद्धका कप्तान सन्दिप जोरा खेलको म्यान अफ द म्याच घोषित भए ।