एजेन्सी – बंगलादेशका विकेट किपर मुशफिकुर रहीमले जिम्बाब्बेवीरुद्धको दोस्रो टेस्टमा दोहोरो शतक प्रहार गर्दै नयाँ विश्व रेकर्ड बनाएका छन् ।

दोस्रो टेस्टको दोस्रो दिन ४ सय ७ बलमा दोहोरो शतक पुरा गर्दै रहीमले नयाँ रेकर्ड बनाएका हुन् । विश्व टेस्ट क्रिकेटमा रहिम दोहोरो शतक दोस्रो पटक प्रहार गर्ने पहिलो विकेट किपर बनेका छन् । यसअघि उनले श्रीलंकासँग सन् २०१३ मार्च ८ तारिखमा टेष्ट क्रिकेटमा दोहोरो शतक बनाएका थिए । रहीमले १५४.३ ओभरमा चौका प्रहार गर्दै दोहोरो शतक पुरा गरेका थिए । विश्व टेस्ट क्रिकेटमा ७ विकेट किपर ब्याटम्यानले दोहोरो शतक एक एक पटक प्रहार गरेका छन् । जस्मा भारत र श्रींलकाका पुर्व कप्तान तथा विकेट किपर महेन्द्र सिंह धोनी र कुमार संगाकारा पनि रहेका छन् ।

दोस्रो दिनको खेल सकिन १८ ओभर बाँकी रहँदा ७ विकेट गुमाएर ५ सय २२ रन बनाएको अवस्थामा बंगलादेशले पहिलो इनिङ्स समाप्ती घोषणा गरेको थियो । बंगलादेशका लागि रहिम २ सय १९ र मेहेदी हसन मिराज ६८ रनमा नट आउट रहे । रहीमले ४ सय २१ बलमा १८ चौका र १ छक्का प्रहार गरे । त्यस्तै मिराजले १ सय २ बलमा ५ चौका र १ छक्का हिर्काए । मोमिन्युल हकले पनि उत्कृष्ट शतक प्रहार गरे । उनले २ सय २४ बलमा १९ चौका प्रहार गर्दै १ सय ६१ रनमा आउट भए ।

कप्तान महमुदुल्लाहले ३६ रन बनाउदा अन्य ब्याटम्यानले दोहारो अंकमा रन छुन सकेनन् । जिम्बाब्बेका लागि केली जर्भिसले ५ विकेट लिए । आजै पहिलो इनिङ्स थालेको पाहुना टोली जिम्बाब्बेले १८ ओभरमा २५ रन बनाउदै १ विकेट गुमाएको अवस्थामा दोस्रो दिनको खेल सकिएको छ । जिम्बाब्बे अझै पहिलो इनिङ्समा ४ सय ९७ रनले पछि परेको छ ।

पहिलो टेस्ट खेलमा १ सय ५१ रनले पराजित भएको घरेलु टोली बंगलादेशलाई श्रृंखला जोगाउन दोस्रो खेल जित्नै पर्ने दबाव रहेको छ ।