चेन्नई (एजेन्सी) – ओपनर शिखर धवन र मिडिल अडरका युवा खेलाडी ऋषभ पन्त चम्केपछि वेस्ट इन्डिजसँगको तीन टी-२० क्रिकेट श्रृंखलामा भारतले क्लिव स्पिव गरेको छ ।

आइतबार राती भएको सिरिजको तेस्रो तथा अन्तिम खेलमा ६ विकेटले पराजित गर्दै श्रृंखला ३-० ले जितेको हो । १ सय ८२ रनको लक्ष्य पक्ष्याएको भारतले अन्तिम बलमा ४ विकेट गुमाउँदै लक्ष्य पुरा गरेको हो । टी-२० क्रिकेट करियरकै उत्कृष्ट ब्याटिङ गरेका शिखरले ६२ बलमा १० चौका र २ छक्का प्रहार गर्दै ९२ रनमा आउट भए ।

पन्तले आक्रमक ब्याटिङ गर्दै ३८ बलमा ५ चौका र ३ छक्का प्रहार गर्दै ५८ रनमा आउट भए । के.एल राहुलले १७ रन बनाउदा कप्तान रोहित शर्मा ४ रनमा आउट भए । अन्तिम बलमा एक रन लिदैँ खेल जिताएका मनिष पाण्डे ४ रनमा नट आउट रहे । वेस्ट इन्डिजका किमो पाउलले दुई विकेट लिए ।

त्यसअघि चेन्नईमा टस जितेर पहिला ब्याटिङ गरेको वेस्ट इन्डिजले निर्धारित २० ओभरमा ३ विकेटको क्षतिमा १ सय ८१ रन बनाएको थियो । वेस्ट इन्डिजका लागि डार्रेन बाभ्रो र निकोलस पूरनले चौथो विकेटका लागि अन्तिम ७ ओभरमा ८७ रनको साझेदारी गर्दै विशाल योगफल तयार पारेका थिए ।

आक्रमक ब्याटिङ गरेका पूरनले मात्र २५ बलमा समान ४ चौका र छक्का प्रहार गर्दै ५३ रनमा नट आउट रहे । बाभ्रोले ३७ बलमा समान दुई चौका र छक्का पहार गर्दै ४३ रनमा नट आउट रहे । ओपनर सिम्रन २६ र शाई होपले २४ रन जोडे । दिनेश रामदिनले १५ रन जोडेका थिए । भारतका लागि युजबेन्द्र चाहलले २ तथा वाशिन्टन सुन्दरले १ विकेट हात पारे ।

भारत पहिलो खेलमा ५ विकेट र दोस्रो खेलमा ७१ रनले विजयी भएको थियो ।