एजेन्सी – वेस्ट इन्डिजमा शुक्रबारबाट सुरु भएको आईसीसी महिला टी–२० विश्वकपमा आयोजक वेस्ट इन्डिज,अष्ट्रेलिया र भारतले विजयी सुरुवात गरेका छन् । वेस्ट इन्डिजले बंगलादेशलाई ६० रनले पराजित गर्दा अष्ट्रेलियाले पाकिस्तानलाई ५२ रनले हराएको छ । त्यस्तै उद्धघाटन खेलमा भारतले न्यूजिल्याण्डलाई ३४ रनले पराजित गरेको छ ।

समुह ए को पहिलो खेलमा टस हारेर ब्याटिङ गरेको वेस्ट इन्डिजले २० ओभरमा ८ विकेट गुमाउँदै १ सय ६ रन बनाउन सकेको थियो । वेस्ट इन्डिजका लागि किसिया ए नाइटले सर्वाधिक ३२ रन जोडिनन् भने बलिङतर्फ बंगलादेशकी जहानारा आलमले ३ विकेट लिइनन् । १ सय ७ रनको लक्ष्य पक्ष्याएको बंगलादेश १४.४ ओभरमा ४६ रनमा अलआउट भयो । बंगलादेशका कुनै पनि खेलाडीले दोहोरो अंकको रन जोड्न सकेनन् । बंगलादेशलाई सस्तैमा रोक्न इन्डिजकी डिड्रा डोटिनले पाँच विकेट लिइन भने सकिरा सिलम्यानले २ विकेट हात पारिन् ।

त्यस्तै समुह बी को दोस्रो खेलमा टस जितेर पहिला ब्याटिङ गरेको अष्ट्रेलियाले ५ विकेटको क्षतिमा १ सय ६५ रन बनाएको थियो । ओपनर खेलाडी एलेसा हेले र बेथ मुनीले ४८–४८ रन जोड्दा कप्तान मेग लेनिङले ४१ रन बनाउदा पाकिस्तानलाई विशाल योगफल दिएको थियो । १ सय ६६ रनको लक्ष्य पक्ष्याएको पाकिस्तानले निर्धारित २० ओभरकम ८ विकेटको क्षतिमा १ सय १३ रन मात्र बनाउन सक्यो ।

त्यस्तै समूह बी को पहिलो खेलमा टस जितेर पहिला ब्याटिङ गरेको भारतले कप्तान हरमनप्रित कौरको शतकमा निर्धारित २० ओभरमा ५ विकेट गुमाउँदै १ सय ९४ बनाएको थियो । कप्तान हरमनप्रित कौर र जेमिमा रोड्रिगेजले १ सय ३४ रनको साझेदारी गर्दै बलियो स्थितिमा पुर्याएका थिए । हरमनप्रितले ५१ बलमा शतकसहित १ सय ३ रन जोडेकी थिइन् । उनले ७ चौका र ८ छक्का प्रहार गरेकी थिन्। यसैगरी रोड्रिगेजले ५९ रन जोडिन्। १ सय ९६ रनको लक्ष्य पक्ष्याएको न्यूजिल्याण्डले निर्धारित २० ओभरमा ९ विकेट गुमाउँदै १ सय ६० रनमात्र जोड्न सक्यो । सूजी बेटेजले ६७ रन बनाए पनि अन्य ब्याटम्यान चल्न नसक्दा पराजित हुन पुग्यो । भारतका लागि दियालन हेमलता र पुनम यादबले समान ३ विकेट लिए ।